Հայաստանի Ազգային Գրադարանը արտերկրի հայ համայնքներուն կողմէ կատարուած նուիրատուութիւններուն շնորհիւ կը շարունակէ համալրուիլ հայագիտական նոր արժէքաւոր հրատարակութիւններով։ Օրերս «Տոնի Նախիջեւանի հայ համայնք»-ի գործադիր տնօրէն Սերկէյ Սայեադովի նուիրատուութեամբ գրադարան մուտք գործած են գիրքեր եւ մամուլի նմուշներ, որոնք կը ներկայացնեն Տոնի Նախիջեւանի հայ համայնքի պատմութիւնն ու մշակոյթը։Նուիրատուութեան մէջ ներառուած է «Տոնի Նախիջեւան» համայնքային թերթը, որ երկար տարիներ եղած է համայնքի հիմնական տեղեկատուական հարթակներէն մին՝ լուսաբանելով մշակութային, կրթական եւ հասարակական կեանքը։ Կարեւոր տեղ կը զբաղեցնէ նաեւ Վլատիսլաւ Սմիրնովի «Տոնի Նախիջեւանի տարեգրութիւն» աշխատութիւնը, որ կը համարուի Տոնի հայերու պատմութեան ամէնէն հիմնարար աղբիւրներէն մին՝ ընդգրկելով հարուստ փաստագրական նիւթ, կենսագրութիւններ եւ արխիւային տուեալներ։

«Տոնի Նախիջեւանը քարտէսի վրայ» պատկերագիրքը կը ներկայացնէ քաղաքի պատմամշակութային պատկերը՝ ներառելով թաղամասեր, եկեղեցիներ, յուշարձաններ եւ պատմական տեղեկութիւններ։ «Մենք այս հողը մեր հայրենիքը կ’անուանենք» (1989) հրատարակութիւնը մանկական երգերու ձայնանիշներու ժողովածոյ է, որ նախատեսուած է դպրոցականներու համար եւ ունի հայրենասիրական ուղղուածութիւն։ Ժամանակակից մօտեցում կը ներկայացնէ «Ինչպէս ստեղծել հայկական երիտասարդական կազմակերպութիւն եւ խուսափիլ գերյոգնածութենէն» ուղեցոյցը, որ գործնական խորհուրդներ կու տայ երիտասարդական կազմակերպութիւններու ստեղծման, խմբային աշխատանքի եւ հոգեբանական կայունութեան պահպանման վերաբերեալ։

Այս նուիրատուութիւնը կարեւոր ներդրում մըն է գրադարանի պահոցներու հարստացման գործին մէջ եւ հնարաւորութիւն կու տայ առաւել ամբողջական պատկերացում կազմելու Տոնի հայ համայնքի պատմութեան, մշակոյթի եւ հասարակական կեանքի մասին։ Շնորհակալութիւն Տոնի Նախիջեւանի հայկական համայնքին եւ Սերկէյ Սայեադովին՝ արժէքաւոր նուիրատուութեան եւ շարունակական համագործակցութեան համար։