Հայաստանի ազգային գրադարանէն ներս հիւրընկալուած էին Հայաստանի Ազգային Ժողովի ամառնային դպրոցի սաները։ Անոնք այցելեցին գրադարանի գրատպութեան թանգարան, շրջայց կատարեցին գրադարանի թամանեանական մասնաշէնքէն ներս, գտնուեցան գրադարանի պատմութեան ցուցասրահէն ներս։ Այնուհետեւ թամանեանական մեծ դահլիճէն ներս հանդիպեցան ժամանակակից գրողներ Մհեր Արշակեանի, Դաւիթ Սամուէլեանի, Արմէն Սարգսեանի եւ Համլեթ Առաքելեանի հետ։

Հանդիպումը շատ տպաւորիչ էր ամառնային դպրոցի մասնակից Երեւանի եւ Հայաստանի մարզերու աւագ դպրոցներու աշակերտներուն համար. անոնք շատ հարցեր ունէին ժամանակակից գրողներուն։ Սուղ ժամանակի պատճառաւ ոչ բոլոր հարցերը հնչեցին, սակայն եղածն ալ բաւական էր աշխուժ, մտերմիկ խօսք ու զրոյց ծաւալելու համար։ Պատանիները յատկապէս կը հետաքրքրէին գեղարուեստական ստեղծագործութեան դաստիարակչական բնոյթի, ժամանակակից գրողի լեզուի ու ոճի, ռամկական լեզուի, գռեհկաբանութիւններու թոյլատրելի-անթոյլատրելիութեան հարցերը։ Աշակերտները զարմացուցին իրենց պատրաստուածութեամբ, կազմակերպուածութեամբ, կուռ գիտելիքներով։

Ազգային գրադարան այցելութիւնը առաջինն էր, բայց ոչ վերջինը անոնց համար, քանի որ շատերը վստահեցուցին, որ համալսարանական կրթութիւն ստանալու ատեն մայր գրադարանի ընթերցող պիտի դառնան։