Հայաստանի ազգային գրադարանէն ներս տեղի ունեցաւ պետական, քաղաքական գործիչ Ալեքսանդր Միասնիկեանի 140-ամեակին նուիրուած հանրային բանախօսութիւն մը։ Միջոցառման զուգահեռ բացուեցաւ գրականութեան ցուցադրութիւն, ուր ներկայացուած էին Ալեքսանդր Միասնիկեանի կեանքի, հասարակական-քաղաքական գործունէութեան եւ ժամանակաշրջանի մասին հրատարակութիւններ։ Միջոցառման բացման խօսքով հանդէս եկաւ Հայաստանի ազգային գրադարանի Ընդհանուր ընթերցասրահի վարիչ Նարինէ Գէորգեանը՝ ընդգծելով Ալեքսանդր Միասնիկեանի նշանակալի դերակատարութիւնը հայ ժողովուրդի հասարակական, քաղաքական եւ մշակութային կեանքին մէջ։ Ան անդրադարձաւ նաեւ այն փաստին, որ 1925 թուականէն մինչեւ 1990 թուականը Հայաստանի գլխաւոր գրադարանը կրած է Ալեքսանդր Միասնիկեանի անունը։

Բանախօսութեամբ հանդէս եկաւ պատմական գիտութեանց դոկտոր, փրոֆեսոր Էտիկ Մինասեանը, որ հանգամանօրէն ներկայացուց Ալեքսանդր Միասնիկեանի կեանքն ու բազմակողմանի գործունէութիւնը։ Բանախօսը անդրադարձաւ անոր հասարակական-քաղաքական գործունէութեան, գրական եւ մշակութային հետաքրքրութիւններուն, ինչպէս նաեւ հայ կրթամշակութային կեանքի զարգացման գործին մէջ ունեցած նշանակալի ներդրման։ Ներկայացուեցան նաեւ Միասնիկեանի պետական գործունէութեան կարեւոր դրուագներն ու անոր թողած ժառանգութեան պատմական արժէքը։ Ցուցահանդէսը պիտի գործէ մինչեւ յունիս 1։