Ապրիլ 7-ին Հայաստանի ազգային գրադարանի Մեծ դահլիճին մէջ կայացաւ Սինէ-ակումբի հերթական ցուցադրութիւնը՝ նուիրուած ֆրանսական համր ֆիլմի նշանաւոր բեմադրիչ Ժերմէն Տիւլաքին։ Երեկոյի ընթացքին ներկայացուեցան անոր երկու կարեւորագոյն ֆիլմերը՝ «Ժպտացող տիկին Պիոտէն» (1923) եւ «Ուղեւորութեան հրաւէրը» (1927), որոնք հանդիսատեսը տարին ֆիլմի վաղ շրջանի նուրբ, խորհրդանշական ու փորձարարական աշխարհը։ Տիւլաքի ստեղծագործութիւնները, առանձնանալով իրենց հոգեբանական խորութեամբ եւ պատկերային բանաստեղծութեամբ, կը բացայայտեն կնոջ ներաշխարհը, ազատութեան ձգտումն ու հասարակական սահմանափակումներու հետ բախումը։

«Ժպտացող տիկին Պիոտէն»-ը սուր ընկերային դիտարկում մըն է՝ ընտանեկան յարաբերութիւններու եւ կնոջ ճնշուած ինքնութեան մասին, մինչդեռ «Ուղեւորութեան հրաւէրը»՝ ներշնչուած Պոտլէրի համանուն ստեղծագործութենէն, հանդիսատեսը կը տեղափոխէ երազային ու զգայական տարածք, ուր իրականութիւնն ու երեւակայութիւնը կը միաձուլուին։ Ցուցադրութիւնը տեղի ունեցաւ ֆրանսերէնով՝ հայերէն եւ անգլերէն ենթագիրներով՝ ապահովելով ֆիլմերուն հասանելիութիւնը լայն լսարանի համար։

Միջոցառումը կազմակերպուած էր «Ֆիլմը կը փոխէ աշխարհը. Ֆրանսա 1895-2026» ծրագրի շրջանակէն ներս, որ կը համադրէ ֆրանսական համր ֆիլմի գլուխգործոցներն ու արդի ֆիլմարուեստի կարեւոր ձեռքբերումները՝ ընդգծելով, թէ ինչպէս ֆիլմը կը ձեւաւորէ մեր ընկալումները, մտածողութիւնն ու իրականութեան զգացողութիւնը։ Սինէ-ակումբը, որ այս տարի կը նշէ իր 5-ամեակը, կը շարունակէ միաւորել ֆիլմի սիրահարները՝ շնորհիւ Հայաստանի մէջ Ֆրանսական հիմնարկի, Ֆրանսայի դեսպանութեան, «Ֆիլմադարան» կազմակերպութեան եւ Հայաստանի ազգային գրադարանի համագործակցութեան։