Երէկ գրադարանի Թամանեանական դահլիճէն ներս տեղի ունեցաւ Անիէս Վարտայի ֆրանսական խորհրդանշական տրամայի մը՝ «Անօթեւան եւ անօրէն» բաց ցուցադրութիւնը։ 1985 թուականին մեծ պաստառ բարձրացած այս ֆիլմը մինչ օրս չէ կորսնցուցած իր արդիականութիւնը։

1985 թուականին անիկա արժանացած է Վենետիկի ֆիլմփառատօնի գլխաւոր մրցանակին՝ «Ոսկեայ առիւծին», ինչպէս նաեւ միջազգային լրագրողական հանրութեան սահմանած «FIPRESCI»-ի հեղինակաւոր մրցանակին։ Մէկ տարի անց՝ 1986 թուականին, Սանտրին Պոննէրը այս ֆիլմին մէջ նկարահանուելու համար արժանացած է «Սեզար» ֆիլմի մրցանակին՝ որպէս լաւագոյն դերասանուհի։

Ֆիլմի բեմադրիչ Անիէս Վարտան, վարպետօրէն համադրելով վաւերագրական եւ գեղարուեստական ֆիլմերու հնարքները, հանդիսատեսը կը խորասուզէ աշխարհի մէջ իր տեղը փնտռող թափառաշրջիկի մը ներաշխարհ: Ֆրանսայի հարաւային ափին նկարահանուած տեսարանները կը ստեղծեն միայնութեան եւ յուսահատութեան զգացում, ինչ որ աններդաշնակօրէն կը հակադրուի բնութեան գեղեցկութեան: