#Ազգային_գրադարանային_շաբթուան ծրագրի շրջանակէն ներս նշուեցաւ անուանի գրադարանագէտ, մատենագէտ, ՀԳԸ փոխնախագահ, Հայաստանի ազգային գրադարանի երկարամեայ փոխտնօրէն Ռաֆիկ Ղազարեանի ծննդեան 80-ամեակը։ Միջոցառման ընթացքին կարեւորուեցաւ Ռաֆիկ Ղազարեանի բազմամեայ վաստակը, գիտական ժառանգութիւնն ու նշանակալի ներդրումը հայկական գրադարանագիտութեան եւ մատենագիտութեան զարգացման գործին մէջ։

Տօնական միջոցառման շրջանակէն ներս գրադարանի մեծ ցուցասրահին մէջ բացուած էր նաեւ գրականութեան ցուցադրութիւն, ուր 12 տարբեր ցուցափեղկերու մէջ ներկայացուած էին Ռաֆիկ Ղազարեանի տարբեր տարիներու շուրջ 80 հրատարակութիւններ, ներառեալ՝ գիրքերն ու մամուլի յօդուածները։ Ցուցադրութիւնը պիտի գործէ մինչեւ ապրիլ 23: Ռաֆիկ Ղազարեանը 1971 թուականէն ի վեր իր գործունէութիւնը կապած է Հայաստանի ազգային գրադարանին հետ, իսկ 1995 թուականէն զբաղեցուցած է փոխտնօրէնի պաշտօնը։ 2004 թուականին ընտրուած է Հայկական գրադարանային ընկերակցութեան փոխնախագահ։ Անոր հեղինակած եւ խմբագրած աշխատութիւնները կարեւոր տեղ կը գրաւեն հայկական գրադարանագիտութեան մէջ։

Լոյս տեսած են Ռաֆիկ Ղազարեանի գրադարանագիտական եւ մատենագիտական արժէքաւոր աշխատութիւնները՝ նուիրուած Գաբրիել Սունդուկեանին («Գաբրիել Սունդուկեան», 1976), Եղիշէ Չարենցին («Եղիշէ Չարենց», համահեղինակ, 1977), Սայեաթ-Նովային («Սայեաթ-Նովա», 1987), «Իրականի եւ ցանկալիի հոլովոյթին մէջ» (2003), Կոմիտասին («Կոմիտաս», 2009), ինչպէս նաեւ Վահան Տէրեանին նուիրուած «Վահան Տէրեան. ինչպէ՞ս երգեմ յիշատակդ քու...» (1985, 2005) աշխատութիւնը։

Ան կազմած եւ խմբագրած է նաեւ «Մտքի թռչող թեւերը» (2006)՝ գիրքի մասին ասոյթներու ժողովածոն, ինչպէս նաեւ կազմած է տարեգրութիւններ՝ «Եղիշէ Չարենց-80» (1977) եւ «Վահան Թէքէեան-100» (1978)։ Տասնեակ յօդուածներու հեղինակ է, շարք մը բանաստեղծական ժողովածոներու հեղինակ։ Օրերս լոյս տեսած է նաեւ «Հաւատա եւ սպասէ» քառեակներու ժողովածոն։ Ռաֆիկ Ղազարեանը արժանացած է շարք մը պատուագիրներու եւ շնորհակալագիրներու, ինչպէս նաեւ պարգեւատրուած է «Յակոբ Մեղապարտ» մետալով (2004), ՀՀ Մշակոյթի նախարարութեան ոսկեայ մետալով (2004) եւ «Մովսէս Խորենացի» մետալով (2012)։ Միջոցառման կը մասնակցէին նաեւ Երեւանի տարբեր գրադարաններէ ներկայացուցիչներ: