Հայաստանի ազգային գրադարանը սերտօրէն կը համագործակցի լիբանանահայ Յարութ Խաչատուրեանի՝ Պէյրութի մէջ գործող երգարաններու, երաժշտական ձեռնարկներու եւ բառարաններու մասնագիտացուած «ԳՈՀԱՐ» գրադարանին հետ: Վերջերս Ազգային գրադարանը 7 միաւոր գիրք նուէր ստացած է «ԳՈՀԱՐ» գրադարանին կողմէ։ Ատոնք այն գիրքերն են, որոնք վերականգնուած են նոյն իրենց մասնագէտներուն կողմէ։

«ԳՈՀԱՐ» գրադարանը բացուած է 2012 թուին՝ հայութեան համար կարեւոր երկու յոբելեաններու՝ հայկական գրատպութեան 500-ամեակին եւ Սայեաթ Նովայի ծննդեան 300-ամեակին առթիւ: Գրադարանէն ներս կան նաեւ հայկական մանրանկարչութեան օրինակներ, ձեռագիր գիրքեր, Կիլիկիոյ թագաւորութեան վերաբերեալ ձեռնարկներ եւ դրօշներու ու դրամներու հաւաքածոյ: Հայկական մշակոյթի աւանդոյթներու պահպանման եւ զարգացման համար կարեւոր նշանակութիւն ունին գրադարանները եւ հետազօտական տարբեր հաստատութիւնները: Վստահ ենք, որ մեր համագործակցութիւնը շարունակական պիտի ըլլայ։