Իր բազմաբնոյթ յանձնառութիւնները իրականացնելու համար Հայաստանի ազգային գրադարանը կը համագործակցի թէ՛ պետական, թէ՛ հասարակական կազմակերպութիւններու հետ։ Այսօր փոխըմբռնման յուշագիր կնքուեցաւ Ազգային գրադարանի եւ «Գրադարան ճարտարապետութեան համար» ճարտարապետական մշակութային հասարակական կազմակերպութեան միջեւ։

Կողմերը համաձայնեցան համագործակցիլ Միլանի 24-րդ միջազգային ցուցահանդէսի հայկական տաղաւարի ստեղծման, ձեւաւորման եւ բովանդակութեան մշակման աշխատանքներուն մէջ։ Ստեղծուելիք տաղաւարը բաց հարթակ մը պիտի հանդիսանայ հայ ճարտարապետներուն եւ արուեստագէտներուն համար։ «Անհաւասարութիւններ. ինչպէ՞ս սոսնձել մարդկութեան խզուածքները» խորագրով Միլանի 24-րդ միջազգային ցուցահանդէսը պիտի մեկնարկէ 2025 թուականի մայիս 17-ին։