Հայաստանի ազգային գրադարանէն ներս երէկ՝ սեպտեմբեր 5-ին տեղի ունեցաւ գրական հանդիպում-կլոր սեղան ռուս ժամանակակից գրողներու հետ՝ Մոսկուայի Թարգմանչական հիմնարկի նախաձեռնութեամբ՝ Գիրքի միջազգային փառատօներուն եւ գիրքի տօնավաճառներուն ռուսական մասնակցութեան ծրագրի շրջանակէն ներս։

Գրադարանը հիւրընկալած էր գրող, թատերագիր, բեմագիր, արուեստի քննադատ եւ հեռատեսիլային հաղորդավար Օլեկ Շիշքինը, արձակագիր, յօդուածագիր, գրականութեան պատմութեան հետազօտող Վլատիսլաւ Օթրոշենքոն, երիտասարդ գրող, լրագրող Սերկէյ Պելեաքովը, գրող, լրագրող Տենիս Լուքիանովը, ինչպէս նաեւ ռուսալեզու հայ գրող, բանաստեղծ, Հայաստանի գրողներու միութեան անդամ Լիանա Շահուերտեանը։

Հանդիպումը վարեց պատմաբան, մշակութաբան, միջազգային ցուցահանդէսներու համադրող Աննա Էսփարզան։ Միջոցառման կը մասնակցէր նաեւ ռուսալեզու հայ գրող, Հայաստանի գրողներու միութեան անդամ Յովհաննէս Ազնաուրեանը։

Գրական հանդիպումներու առաջին օրը նուիրուած էր «Վաւերագրական վէպ. 21-րդ դարու լաւագոյն վաճառուող գիրք» նիւթին: Այսօր՝ սեպտեմբեր 6-ին ստեղծագործական հանդիպում մը տեղի կ’ունենայ ժամանակակից ռուս գրող, պատմաբան, գրաքննադատ Սերկէյ Պելեաքովի հետ, ով կը վարէ գրաքննադատ Իւան Ռոտիոնովը։ Հանդիպման նիւթը՝ «Օսթափ Պենտէր. կերպարի ստեղծողները եւ նախատիպերը՝ իրական եւ յօրինովի»։