Մեծ ցաւով իմացանք, որ կեանքէն հեռացած է գրող, թարգմանիչ, հրապարակախօս, գրական, մշակութային եւ հասարակական բեղմնաւոր գործիչ, Հայաստանի ազգային գրադարանի վաղեմի, նուիրեալ բարեկամ Ֆելիքս Բախչինեանը։ Ֆելիքս Բախչինեանը հարիւրէ աւելի ինքնուրոյն ու թարգմանական գիրքերու հեղինակ է, կազմած եւ հրատարակած է տասնեակ ու տասնեակ ժողովածոներ։ Գրական անխոնջ մշակի իր հետքը արդի գրականութեան մէջ նշանակալից է եւ մեծարժէք։

Ֆելիքս Բախչինեանը ամբողջ կեանքին ընթացքին կապուած եղած է գիրքի, գրականութեան, թարգմանչական գործի եւ գրադարաններու հետ։ Իբրեւ հետազօտող եւ գիտնական՝ ան իր կեանքին զգալի մէկ մասը անցուցած է գրադարաններուն մէջ։ Բախչինեանը գրադարաններու հետ կապուած է կենսագրութեամբ եւ կոչումով։ Ժամանակին անի աւարտած է Էջմիածնի ակումբագրադարանային արհեստագիտական ակումբը։ Իսկ 1970-ական թուականներուն եղած է Թումանեանի շրջանի գրադարաններու կեդրոնացուած համակարգի հիմնադիր տնօրէն։ Հայաստանի ազգային գրադարանի մեծ բարեկամ Ֆելիքս Բախչինեանը 2022 թուականին գրադարանի հաւաքածոներու համալրման մատուցած ծառայութիւններուն համար «Ազգային գրադարանի բարեկամ» ճանչցուած է։ 2008 թուականէն մինչ օրս անոր միջոցաւ գրադարանը 1234 անուն 6470 միաւոր գրականութիւն ստացած է։ Անոր հիմնադրած «Ֆրիտիոֆ Նանսէն» հիմնադրամի բազմաթիւ գիրքերու տպաքանակի մէկ մասը մենք Հայաստանի մարզային եւ համայնքային տասնեակ գրադարաններու փոխանցած ենք։

Իր անսպասելի մահուան նախօրեակին Ֆելիքս Բախչինեանը այցելած էր Հայաստանի ազգային գրադարան. քննարկած էր հոկտեմբեր 10-ին «Նանսէնը եւ Հայաստանը» խորագրով ցերեկոյթի ծրագիրը, որուն ընթացքին պիտի ներկայացուէր նաեւ իր թարգմանած վերջին գիրքը։ Այդ օրը, օգտագործելով վրաց գործընկերներուն հետ իր վաղեմի կապերը, Բախչինեանը հեռաձայնային զանգով իրարու հետ ծանօթացուց Վրաստանի եւ Հայաստանի ազգային գրադարաններու տնօրէնները։ Կողմերը պայմանաւորուեցան նոյեմբերին Հայաստանի ազգային գրադարանէն ներս հիւրընկալել վրաց գործընկերները։ Ֆելիքս Բախչինեանի անունը ընդմիշտ պիտի մնայ Ազգային գրադարանի բարեկամներու յիշատակի մատեանին մէջ: