Հոկտեմբեր 29-ին Հայաստանի ազգային գրադարանէն ներս տեղի ունեցաւ գիրքերու ցուցահանդէսի բացում եւ հանդիսութիւն՝ նուիրուած Չինաստանի Ժողովրդական Հանրապետութեան հիմնադրման 75-ամեակին: Միջոցառման ընթացքին ներկայացուեցան գրադարանի չինական հաւաքածոյի եզակի նմուշներ, չինական արուեստին նուիրուած պատկերագիրքեր, չինարէնէ կատարուած գրական թարգմանութիւններ, Մատենադարանի հնագոյն չինական ձեռագիրներու թուայնացուած նմուշներ։

Միջոցառման ընթացքին ելոյթ ունեցան «Հայաստան-Չինաստան» բարեկամութեան միութեան նախագահ Կարէն Աւագեանը, Հայաստանի մէջ Չինաստանի արտակարգ եւ լիազօր դեսպան Չեն Մինը, Ազգային գրադարանի տնօրէնուհի Աննա Չուլեանը եւ «Չինական գիտութեան եւ մշակոյթի կեդրոնի» տնօրէնուհի Իզապելա Մուրատեանը։ Ազգային գրադարանի տնօրէնուհի Աննա Չուլեանը իր ելոյթին մէջ խօսեցաւ Հայաստանի ազգային գրադարանի չինական հաւաքածոյի հազուագիւտ նմուշներուն, մասնաւորապէս 19-րդ դարուն չինարէնէ հայերէն եւ հայերէնէ չինարէն թարգմանուած գիրքերուն, «Սասունցի Դաւիթ» դիւցազնավէպի չինարէն հրատարակութեան, հայ-չինական գրադարանային կապերուն մասին։

Միջոցառման գեղարուեստական բաժնին մէջ Ալեքսանդր Սպենդիարեանի անուան օփերայի եւ պալեթի ազգային ակադեմական թատրոնի մենակատար Զենիա Անտրէյենքոն կատարեց Այշայի պարը Արամ Խաչատրեանի «Գայիանէ» պալեթէն, իսկ «Վիքթորիա» պարարուեստի դպրոցի աշակերտները ներկայացուցին հայկական եւ չինական պարային կատարումներ։