Ռոզարիու Ալսադա Արաուժոն, ծնված Լիսաբոնում 1973 թվականին, վաղ տարիքից բացահայտել է հետաքրքրությունը գրականության հանդեպ։ Ավարտելով իրավաբանական կրթությունը՝ նա հրաժարվել է այդ ուղղությունից և ուսումը շարունակել Լոնդոնում՝ հաղորդակցության սոցիոլոգիայի մագիստրոսական ծրագրում։ Այնտեղ էլ խորացել է մանկական գրականության մեջ՝ մասնակցելով ստեղծագործական գրելու դասընթացների և ուսումնասիրելով ժանրը գրադարաններում ու գրախանութներում։ Նրա գրական ուղին սկսվել է 2002-ին՝ առաջին մանկական գրքի հրատարակմամբ, իսկ այսօր նրա բազմաթիվ ստեղծագործություններ ընդգրկված են Պորտուգալիայի Ազգային Ընթերցանության ծրագրում։ Քննարկման կենտրոնում էր հեղինակի առավել հայտնի գործերից մեկը՝ «Նարինջների երկիրը», որը հիմնված է իրական պատմական իրադարձությունների վրա։

Վեպը պատմում է Երկրորդ համաշխարհային պատերազմից հետո Ավստրիայից Պորտուգալիա տեղափոխված 5500 երեխաների մասին՝ ներկայացնելով նրանց դժվար ճանապարհը, ինքնության որոնումները, հույսը և վերակառուցվող կյանքի պատմությունները։ Հանդիպման ընթացքում Ռոզարիու Ալսադա Արաուժոն և գրքի հայերեն թարգմանիչ Աննա Մարությանը խոսեցին մանկապատանեկան գրականության հայեցակարգային նշանակության մասին թվային դարաշրջանում, ստեղծագործական գործընթացի նրբությունների, թարգմանության և մշակութային փոխանցման դերի մասին։

Մասնակիցները հնարավորություն ունեցան լսելու գրքի հատվածներ՝ պորտուգալերեն բնագրով և հայերեն թարգմանությամբ։ Հանդիպման և քննարկումների ընթացքում առանձնապես ակտիվ էին Երևանի №112 ավագ դպրոցի և ՀԱՊՀ ավագ դպրոցի սաները, ովքեր բարձրացրին ինչպես գրական, այնպես էլ պատմական և հոգեբանական բնույթի հարցեր։ Հեղինակը սիրով պատասխանեց դրանց՝ ստեղծելով ջերմ, աշխույժ և ներշնչող մթնոլորտ։