Արդէն երկրորդ տարին է, որ Վ․ Պրիւսովի անուան պետական համալսարանի, Հայաստանի մէջ ֆրանսական համալսարանի եւ Երեւանի պետական համալսարանի տասը ֆրանսախօս ուսանողներ կ'ընդգրկուին Հայաստանի Կոնքուր մրցանակաբաշխութեան մրցատեանի կազմին մէջ՝ աշխուժ մասնակցութիւն ունենալով ժամանակակից ֆրանսագիր գրականութեան գնահատման եւ ընտրութեան գործընթացին։

Հայաստանի Կոնքուր մրցանակաբաշխութիւնը կ'իրականացուի Հայաստանի մէջ Ֆրանսայի դեսպանատան, Ֆրանսական հիմնարկի, Հայաստանի մէջ ֆրանսական համալսարանի եւ «Նիումեկ»-ի հովանաւորութեամբ։ Այս տարուան ընթերցանութեան մեկնարկը տրուեցաւ նոյեմբերին։ Ուսանողները մեծ ոգեւորութեամբ ձեռնամուխ եղան ընթերցանութեան՝ ուսումնասիրելով ֆրանսական հեղինակաւոր Կոնքուր մրցանակաբաշխութեան կողմէ առաջադրուած ութ ժամանակակից ֆրանսագիր հեղինակներու վէպերը։

Ինչպէս նախորդ տարի, այս տարի եւս Հայաստանի ազգային գրադարանը հիւրընկալեց մրցատեանի անդամները, վէպի քննարկումը կլոր սրահին մէջ անցընելու համար։ Հանդիպման ընթացքին ուսանողները, Հայաստանի մէջ ֆրանսական համալսարանի վերատեսուչ Սալուա Նաքուզիի, նոյն համալսարանի դասախօս Անահիտա Գասպարեանի եւ Պրիւսովի պետական համալսարանի ֆրանսական գրականութեան դասախօս Անի Ջանիկեանի ուղեկցութեամբ, քննարկեցին Լորան Մովինիէի «Դատարկ տունը» վէպը, որ ի դէպ ֆրանսական Կոնքուր մրցանակաբաշխութեան այս տարուան դափնեկիրն է։