Հոկտեմբեր 14-էն 19 Հայաստանի ազգային գրադարանին Հանրային կապերու բաժնի մասնագէտ Արեւիկ Խաչատրեանը, Արտաքին կապերու բաժնի մասնագէտ Մարինա Սահակեանը եւ առաջին կարգի գրադարանապահ Անահիտ Նաճարեանը մասնակցեցան «Նոր սերունդ» ծրագրի շրջանակէն ներս իրականացուած «ԱՊՀ անդամ երկրներու գրադարաններու կրթական համագործակցութիւն» միջազգային սեմինար-ծրագրին։ Սեմինարի նպատակն էր խթանել Անկախ պետութեանց համագործակցութեան երկրներու գրադարաններու միջեւ մասնագիտական փորձի փոխանակումը, զարգացնել հաղորդակցական եւ կառավարչական հմտութիւնները, ինչպէս նաեւ խորացնել գիտելիքները հակամարտական իրավիճակներու կանխարգելման եւ արդիւնաւէտ լուծման վերաբերեալ։ Մասնակիցները ներգրաւուած էին դասախօսութիւններու, գործնական քննարկումներու ու խումբային վարժութիւններու՝ մասնագիտական հաղորդակցութեան բարելաւման ուղղուած։

Դասընթացի ընթացքին ուսումնասիրուեցան հակամարտութիւններու առարկայական եւ ենթակայական գործօնները, վերլուծուեցան հակամարտական վարքագծի տարբեր ռազմավարութիւններ, իրականացուեցաւ նաեւ ստեղծագործական խումբ-խաղ՝ «Ստեղծէ՛ քու գրադարանդ», որուն ընթացքին ձեւաւորուեցան նորարարական գրադարանային ձեւաչափեր եւ ծառայութիւններու գաղափարներ։ Սեմինարը կազմակերպուած էր Ռուսիոյ պետական գրադարանի, Եւրասիոյ գրադարանային յանձնաժողովի եւ Անկախ պետութեանց համագործակցութեան Դաշնակցային գործակալութեան նախաձեռնութեամբ։

Ծրագրի շրջանակէն ներս մասնակիցները այցելեցին նաեւ Ռուսիոյ պետական երիտասարդական գրադարան եւ Ի. Թուրկենեւի անուան գրադարան-ընթերցասրահ՝ ծանօթանալով անոնց աշխատանքային փորձին եւ նորարարական մօտեցումներուն։ Միջոցառման աւարտին ձեռք բերուեցան նախնական պայմանաւորուածութիւններ՝ ՀՀ եւ ԱՊՀ շարք մը երկրներու գրադարաններու միջեւ համագործակցութեան խորացման եւ համատեղ ծրագիրներու իրականացման ուղղութեամբ։ Լուսանկարները՝ Մարիա Կովթուանին: