Ազգային գրադարանային շաբթուան եւ Ֆրանսախօսութեան երկամսեակին շրջանակէն ներս Ազգային գրադարանի թամանեանական մեծ դահլիճէն ներս ցուցադրուեցաւ Սինէ-ակումբին հերթական ֆիլմը: Այս անգամ ֆիլմասէրներուն ուշադրութեան ներկայացուեցաւ Քլոտ Շապրոլի «Սիրուն Սերժը» ֆիլմը։ Ֆիլմին նկարահանումները կատարուած են ֆրանսական Սարտան գիւղին մէջ, ուր Երկրորդ աշխարհամարտի տարիներուն անցած է բեմադրիչ Քլոտ Շապրոլի մանկութիւնը։ «Քլոտ Շապրոլիը մանկութենէն, ինչպէս կ’ըսեն, տոգորուած էր ֆիլմի հանդէպ շատ մեծ սիրով։ Ան, Փարիզէն գիւղ տեղափոխուած ըլլալով պատերազմի պատճառաւ, արդէն 12 տարեկանին ֆիլմի ակումբ մը կը ստեղծէ, ֆիլմեր, ժապաւէներ կը գտնէր եւ ներկայացումներ կը կազմակերպէր գիւղի երեխաներուն համար»,- ֆիլմին ցուցադրութենէն առաջ ըսաւ ֆիլմագէտ Արթուր Վարդիկեանը՝ խօսելով բեմադրիչին մանկութեան, անոր հետաքրքրութիւններուն ու տաղանդին մասին։

«Սիրուն Սերժը», որ մեծ պաստառ բարձրացած է 1958 թուականին, շատ մեծ յաջողութիւն բերած է սկսնակ բեմադրիչին։ ֆիլմագէտին խօսքով՝ անիկա կը համարուի Նոր ալիքի հիմնադիր, սկզբնաւորող ֆիլմը, թէ՛ Ֆրանսայի մէջ, թէ՛ Ֆրանսայէն դուրս արժանացած է շատ մեծ գնահատանքի եւ մրցանակներու։

Ամփոփելով ֆիլմի ակումբի շրջանակէն ներս գրադարանէն ներս ցուցադրուած ֆիլմերուն արդիւնքները՝ Արթուր Վարդիկեանը նշեց, որ նոր ալիքի այդ բոլոր չորս ֆիլմերուն մէջ ալ նկատելի է «ապրումը նորին ու հինին միջեւ, ինչ որ եւս պատահական չէ»։

Յաւելենք, որ Սինէ-ակումբը Հայաստանի ազգային գրադարանէն ներս կը գործէ արդէն երրորդ տարին ըլլալով՝ «Ֆիլմադարան» ֆիլմի մշակոյթի զարգացման հասարակական կազմակերպութեան, Ազգային գրադարանի, Հայաստանի մէջ Ֆրանսայի դեսպանութեան Ֆրանսական հիմնարկի համագործակցութեամբ։ Ֆիլմերը կը ցուցադրուին ֆրանսերէն՝ հայերէն եւ անգլերէն ենթագիրներով: Մուտքը ազատ է: Հասցէն՝ Տէրեան 72: