Ազգային գրադարանային շաբթուան ծրագրի շրջանակէն ներս այսօր Հայաստանի ազգային գրադարանէն ներս տեղի ունեցաւ «Ուրախ գրադարան» խաղ-մրցոյթը։ Մրցոյթին մասնակցեցան Երեւանի «Յակոբ Կոճոյեան» կրթահամալիրի 11-րդ դասարանի եւ «Մխիթար Սեբաստացի» կրթահամալիրի 10-11-րդ դասարաններու աշակերտներէն կազմուած խումբերը՝ ցուցադրելով իրենց գիտելիքները, արագ կողմնորոշուելու կարողութիւնն ու խմբային աշխատանքի հմտութիւնները։

Մրցոյթի ընթացքին ստեղծուած էր այնպիսի միջավայր մը, ուր մասնակիցները ոչ միայն կը մրցէին, այլեւ աշխուժօրէն կը բացայայտէին գիրքի, ընթերցանութեան եւ գրադարանային գործի աշխարհը։ Այս ձեւաչափը կը խթանէ դպրոցականներու հետաքրքրութիւնը ընթերցանութեան հանդէպ, կ'օգնէ ճանչնալ գրական բազմազանութիւնն ու կը զարգացնէ տեղեկատուութեան որոնման եւ կիրառման կարեւոր հմտութիւնները։ Մրցոյթի փուլերը կը ներառէին՝

🔹 «Ճանչցի՛ր գիրքը կամ պատմուածքը»,

🔹 «Ճանչնանք հայ գրողները իրենց աւազանի անունով»,

🔹 «Դասաւորել գիրքերը ըստ գիտութեան ճիւղերուն»,

🔹 Դերախաղ՝ «խորհրդատու գրադարանավար»,

🔹 Մատենագիտական նկարագրութիւններու կազմում:

Այս առաջադրանքները հնարաւորութիւն տուին մասնակիցներուն պատկերացում կազմելու գրադարանավարի մասնագիտութեան կարեւորութեան եւ բազմաշերտ բնոյթի մասին՝ սկսած գրականութեան ճանաչումէն եւ դասակարգումէն մինչեւ ընթերցողին հետ աշխատանք եւ տեղեկատուութեան համակարգուած ներկայացում։ Մրցոյթի արդիւնքները գնահատեց մրցատեանը՝

▪️ ՀԱԳ տնօրէնուհի Աննա Չուլեան,

▪️ Ուսուցիչ Արսէն Վարդանեան,

▪️ Գրադարանավար Ներսէս Հայրապետեան,

▪️ Գրող, թարգմանիչ Անոյշ Սարգսեան:

Մրցոյթի աւարտին բոլոր մասնակիցները ստացան խրախուսական մրցանակներ՝ գիրքեր, իսկ յաղթող խումբը՝ «Յակոբ Կոճոյեան» կրթահամալիրի սաները, իրենց ամբողջ դասարանին համար ստացան Հայաստանի ազգային գրադարանի գրատպութեան թանգարան այցելութեան անվճար տոմս։ «Ուրախ գրադարան» խաղ-մրցոյթը անգամ մը եւս ընդգծեց, որ ժամանակակից գրադարանը ոչ միայն գիրքերու պահոց է, այլ կենդանի կրթական միջավայր մը, ուր կը ձեւաւորուին գիտելիք, արժէքներ եւ ապագայ մասնագիտական կողմնորոշում։ #Ազգային_գրադարանային_շաբաթ #Ուրախ_գրադարան