Հայաստանի ազգային գրադարանի բեմին վրայ էին շնորհալի պատանի երաժիշտ կատարողներ: Կանանց տօնին ընդառաջ՝ մարտ 7-ին, գրադարանի թամանեանական մեծ դահլիճին մէջ տեղի ունեցաւ «Մաէսթրո» մշակութային կազմակերպութեան «Բիւր աստղ» նախագծի հերթական համերգը: Գրադարանի պատերուն ներքեւ թեւածեցին ազգային նուագարաններու՝ քանոնի, քամանչայի, սանթուրի, պլուլի, ուտի, դափի հնչիւնները, թաւջութակի ու դաշնամուրի ելեւէջները, տհոլներու խրոխտ ձայնը: Իսկ Արամէ Յունանեանի ձայնային կատարումը ամբողջացուց երաժշտական համայնապատկերը:  
 
 

Ցուցադրուեցան նաեւ պատանի ստեղծագործողներու կտաւները եւ Ժողովրդական արուեստներու «Հանգոյց» հիմնադրամի պատանի գորգագործներու աշխատանքները:

Տօնին առթիւ Ազգային գրադարանը շնորհալի պարմանուհիներուն գիրքեր նուիրեց: Միջոցառումը վարեց «Մաէսթրո» մշակութային կազմակերպութեան ղեկավար Վարդուհի Գէորգեանը:

«Բիւր աստղ» նախագիծը «Մաէսթրո» մշակութային կազմակերպութեան եւ Հայաստանի պետական ֆիլհարմոնիքի համատեղ նախաձեռնութիւնն է, որ կեանքի կոչուած է 2022-ի փետրուարէն: Նպատակն է Երեւանէն, Հայաստանի մարզերէն, հեռաւոր սահմանամերձ համայնքներէն, արտերկրէն տաղանդաւոր երաժիշտներու, նկարիչներու, կիրառական արուեստով զբաղողներու համախմբումն ու համատեղ ծրագիրներու մէջ ներգրաւումը: