Յունուար 31-ին Հայաստանի ազգային գրադարանին մէջ Վահան Տէրեանի ծննդեան 140-ամեակին նուիրուած հանրային դասախօսութիւն ներկայացուց «Տէրեան մշակութային կեդրոն» հասարակական կազմակերպութեան նախագահ Առուշան Յակոբեանը։

Դասախօսը ներկայացուց Վահան Տէրեանի կեանքը անոր մանկութեան տարիներէն մինչեւ Լազարեան ճեմարանին մէջ անոր ուսումնառութեան տարիները, բանաստեղծական առաջին փորձերէն մինչեւ Յովհաննէս Թումանեանի եւ Աւետիք Իսահակեանի օրհնութեամբ «Մթնշաղի անուրջներ» ժողովածոյին տպագրութիւնը, երիտասարդ բանաստեղծի կեանքի թիֆլիսեան տարիները, անոր մասնակցութիւնը Վերնատան քննարկումներուն։ Պարոն Յակոբեանը իր խօսքը համեմեց Տէրեանի բանաստեղծութիւններու արտասանութեամբ եւ վերլուծութեամբ։ Ան անդրադարձաւ նաեւ բանաստեղծի հասարակական-քաղաքական գործունէութեան մինչեւ Տէրեանի վերջին գործուղումը, հիւանդութիւնը եւ մահը։

Ազգային գրադարանին մէջ գիրքերու ցուցահանդէս մը բացուած է նուիրուած Վահան Տէրեանի 140-ամեակին։ Ցուցահանդէսին մէջ ներկայացուած են բանաստեղծին գործերը եւ առանձին ժողովածոները, անոր կատարած թարգմանութիւնները, անոր մասին գրականագիտական եւ բանասիրական ուսումնասիրութիւնները, Տէրեանին նուիրուած պատկերագիրքեր, նօթեր եւ լուսանկարներ։ Ցուցահանդէսը պիտի գործէ մինչեւ փետրուար 7։