Հոկտեմբերի 13-ին և 14-ին Հայաստանի ազգային գրադարանում՝ Հունգարական կենտրոնի հետ համագործակցությամբ, տեղի ունեցան Հունգարական կինոյի օրերի շրջանակում նախատեսված ֆիլմերի ցուցադրությունները։ Միջոցառման ընթացքում հանդիսատեսին ներկայացվեցին ժամանակակից հունգարական կինոյի երկու ուշագրավ ստեղծագործություններ՝ Լայոշ Կոլտայի «Սեմմելվայս» (Semmelweis, 2023) պատմական դրաման և Քրիշտոֆ Դեակի «Թոռը» (Az Unoka / The Grandson, 2022) դրամատիկ թրիլերը։

«Սեմմելվայս» (Semmelweis)

Ֆիլմը պատմում է հունգարացի բժիշկ Իգնաց Սեմմելվայսի մասին, որը 1847 թվականին Վիեննայի ծննդատներից մեկում փորձում է բացահայտել ծննդաբերական տենդի տարածման պատճառները։ Բախվելով ժամանակի բժշկական հանրության դիմադրությանը՝ նա պայքարում է իր գիտական բացահայտումն ապացուցելու և բազմաթիվ կանանց կյանքեր փրկելու համար։ Ֆիլմն անդրադառնում է գիտական ճշմարտության որոնմանը, մասնագիտական խիզախությանն ու նորարար գաղափարների ընդունման դժվարություններին։ «Թոռը» (Az Unoka / The Grandson)

Քրիշտոֆ Դեակի ֆիլմի գլխավոր հերոսը՝ Ռուդին, բախվում է ընտանեկան ծանր իրավիճակի, երբ նրա տարեց պապիկը դառնում է հեռախոսային խարդախության զոհ։ Փորձելով հասնել արդարության՝ Ռուդին սկսում է սեփական հետաքննությունը, որը նրան դուրս է բերում սովորական կյանքի սահմաններից և ստիպում վերանայել իր պատկերացումները պատասխանատվության, արդարության ու մարդկային հարաբերությունների մասին։ Ֆիլմը միավորում է թրիլերի լարվածությունը և ընտանեկան դրամայի հուզական շերտերը։ Երկու ֆիլմերն էլ ստեղծվել են Հունգարիայի Ազգային կինոինստիտուտի (National Film Institute – Hungary) աջակցությամբ։ Հունգարական կինոյի օրերը հնարավորություն ընձեռեցին ծանոթանալու Հունգարիայի կինեմատոգրաֆիական ժառանգությանն ու ժամանակակից կինոյի թեմատիկ բազմազանությանը՝ բացահայտելով պատմական իրադարձությունների, մարդկային արժեքների և հասարակական խնդիրների գեղարվեստական մեկնաբանությունները։