Հայաստանի ազգային գրադարան էին այցելել Հայ կրթական հիմնարկության տնօրենների խորհդի անդամները։ Գրադարանի տնօրեն Աննա Չուլյանի ուղեկցությամբ նրանք շրջայց կատարեցին գրադարանի թամանյանական մասնաշենքում, ծանոթացան գրադարանի պատմության նորաբաց ցուցասրահին, այնուհետև եղան Գրատպության թանգարանում։ Թանգարանի վեց ցուցասրահները նրանց առջև բացեցին հայ գրատպության ամբողջ ուղին, հայկական տպագրության պատմության ուշագրավ դրվագները։

Հայ կրթական հիմնարկությունը հիմնադրվել է 1950 թվականին Լոս Անջելեսում` հայ ուսանողներին և կրթական հաստատություններին աջակցելու նպատակով: 1986-ին UCLA-ի համալսարանում Ռիչարդ Հովհաննիսյանի անվան նորագույն պատմության ամբիոնի հիմնադրման համար Հայ կրթական հիմնարկությունը զգալի գումար է նվիրաբերել:

Տարիների ընթացքում Հայ կրթական հիմնարկությունը 200-ից ավելի դպրոց է վերանորոգել ու հիմնանորոգել Հայաստանում, Արցախում և Ջավախքում: Հարյուրավոր ուսանողներ տարիներ շարունակ ստացել են կրթաթոշակներ` ուսման ամբողջական վճարի չափով: ՀԿՀ-ն նաև Հայաստանի ազգային գրադարանի վաղեմի բարեկամն է։