Հայաստանի մէջ, Ազգային գրադարանային շաբթուան շրջանակէն ներս Ուքրանիոյ դեսպանութիւնը Ազգային գրադարանին նուիրեց ուքրանացի հեղինակներու հայերէն թարգմանութեամբ աւելի քան 10 անուն նոր գիրքեր։ նուիրատուութեան մէկ մասը պիտի յատկացուի մարզային եւ համայնքային գրադարաններուն։  
Հայաստանի ազգային գրադարանի տնօրէնուհի Աննա Չուլեանը եւ Հայաստանի մէջ Ուքրանիոյ գործոց ժամանակաւոր հաւատարմատար Ալեքսանդր Սենչեքոն քննարկեցին հայ-ուքրանական վաղեմի բարեկամութեան, մշակութային, գրական առնչութիւններու հարցեր եւ համագործակցութեան նոր ուղիներ։  
Արուեստի բաժինը կազմակերպած էր ուքրանացի արուեստագէտներու պատկերատետրային հրատարակութիւններու փոքրիկ ցուցադրութիւն մը՝ Ազգային գրադարանի հարուստ հաւաքածոյէն։