Հայաստանի ազգային գրադարանին մէջ այսօր՝ Գիրք նուիրելու օրը, տեղի ունեցաւ ԿԳՄՄ նախարարութեան կազմակերպած «Մայրենի»-ի (ընթերցանութիւն) ողիմպիականի յաղթողներու պարգեւատրման արարողութիւնը: Կրթութեան, գիտութեան, մշակոյթի եւ մարմնամարզութեան նախարար Ժաննա Անդրէասեանը հանդիպեցաւ Երեւանի եւ Հայաստանի մարզերու դպրոցներու 5-6-րդ դասարաններու՝ մրցոյթի յաղթող 30 աշակերտներու հետ։ Նախարարը կարդաց Ղազարոս Աղայեանի պատումներէն մէկը, որուն շուրջ երեխաներուն հետ աշխուժ քննարկում ծաւալուեցաւ։

Այնուհետեւ երեխաները հանդիպեցան մանկական գիրքերու ճանչցուած թարգմանիչ Ալվարդ Ջիւանեանին։ Ան խօսեցաւ մանկական գրականութեան պատմութեան, իր թարգմանութիւններուն, թարգմանական նրբութիւններուն եւ մասնաւորապէս, Հարի Փոթէրին նուիրուած վիպաշարին մասին։

Ազգային գրադարանի տնօրէնուհի Աննա Չուլեանը, շնորհաւորելով յաղթող երեխաները, զանոնք կոչեց «Ընթերցանութեան ողիմպիական ախոյաններ»։ Հաշուի առնելով երեխաներուն ընթերցասիրութիւնը, բացառութեան կարգով, ընթերցանութեան ախոյաններուն տրամադրուեցան Ազգային գրադարանի ընթերցողական տոմսեր։ Ծրագրի վերջաւորութեան երեխաները շրջայց կատարեցին գրադարանի ընդհանուր ընթերցասրահին եւ Գրատպութեան թանգարանին մէջ։