Ամերիկահայ գրող եւ նկարազարդող Նոննի Հոկրոկեանի «Հրաշալի օր մը» («One Fine Day») հեղինակային գիրքին չինարէն թարգմանութիւնը Ազգային գրադարանի չինացի բարեկամ, դասախօս Ճի Կոչինի՝ գրադարանին նուիրած գիրքերու ցանկին մէջ է: Մեր հայրենակցի՝ Հոկրոկեանի գրած եւ նկարազարդած այս մանկական գունեղ գիրքը Յովհաննէս Թումանեանի «Պոչատ աղուէսը» հեքիաթին վերապատումն է եւ թարգմանաբար լոյս տեսած է եւս քանի մը լեզուներով։

«One Fine Day»-ի նկարազարդման համար Հոկրոկեանը 1972-ին արժանացած է Ամերիկայի Միացեալ Նահանգներու ամէնէն հեղինակաւոր՝ Քալտեքոթի ամէնամեայ մետալին: Ընդ որում, ան այս մետալի կրկնակի դափնեկիր է (առաջին մետալը ստացած է 1966-ին՝ «Always Room for One More» գիրքի նկարազարդման համար):

Նոննի Հոկրոկեանը (1932-2024) ԱՄՆ-ի մէջ յայտնի եւ ճանչցուած հեղինակ է առաւելապէս մանկական պատկերազարդ գիրքերով։ Զինք մանուկ հասակէն գրաւած են ժողովրդական բանահիւսութիւնը, հեքիաթները, քերթողութիւնը, երեւակայականը ու պատմուածքները։ Հոկրոկեանի ամուսինը՝ անգլիագիր գրող, բանաստեղծ, կենսագիր եւ մանկագիր Տէյվիտ Խերտեանը, նոյնպէս ճանչցուած հեղինակ է, որ Նիուպերի (Newbery Honor) գրական մրցանակ ստացած է «Ճանապարհ տունէն. հայ աղջկայ պատմութիւնը» գիրքին համար (1979)։