Հայաստանի ազգային գրադարանէն ներս տեղի ունեցաւ «ՄԽԻԹԱՐ ԱԲԲԱՀԱՅՐԸ ԵՒ ՄԽԻԹԱՐԵԱՆ ՄԻԱԲԱՆՈՒԹԻՒՆԸ» խորագրով միջոցառումը, որ կազմակերպուած էր Երեւանի «Մխիթար Սեբաստացի» կրթահամալիրի, «Տիգրան Հայրապետեան» գրադարանի եւ Մխիթարեան Ճեմարանի (Mekhitarian Centre of Armenia) հետ համատեղ: Միջոցառումը նուիրուած էր Մխիթար Սեբաստացիի ծննդեան 350 եւ Վենետիկի Մխիթարեան միաբանութեան հիմնադրման 325-ամեակներուն։ Ներկաները ողջունեց Հայաստանի ազգային գրադարանի Գրատպութեան թանգարանի (The Museum of Printing) վարիչ Բալասան Յարութիւնեանը։ Ան անդրադարձաւ Մխիթար Սեբաստացիի գործունէութեան եւ ընդգծեց Մխիթարեան միաբանութեան կարեւոր դերը հայ մշակոյթի, կրթութեան եւ գրատպութեան զարգացման գործին մէջ։ Ելոյթ ունեցաւ նաեւ «Մխիթար Սեբաստացի» կրթահամալիրի հիմնադիր տնօրէն Աշոտ Բլէեանը, ով խօսեցաւ կրթահամալիրին կողմէ Մխիթար Սեբաստացիի անունը կրելու կարեւորութեան մասին՝ ընդգծելով այն մեծ առաքելութիւնը, որ իր վրայ վերցուցած է կրթահամալիրը։ Ան անդրադարձաւ նաեւ այն աշխատանքներուն, որոնք կ'իրականացուին Սեբաստացիի ժառանգութիւնը հանրայնացնելու նպատակաւ, ինչպէս նաեւ ներկայացուց յոբելեանական տարուան ընթացքին նախատեսուող ծրագիրները։

Միջոցառման ընթացքին ելոյթ ունեցաւ նաեւ Երեւանի Մխիթարեան ճեմարանի տեսուչ Հայր Գէորգ Սարգիսեանը՝ խօսելով Մխիթար Սեբաստացիի հոգեւոր եւ մշակութային ժառանգութեան, ինչպէս նաեւ Մխիթարեան միաբանութեան նշանակալի գործունէութեան մասին։ Կրթահամալիրի սաները ներկայացուցին «Մխիթար Աբբահօր ոտնահետքերով» զեկոյցը (պատասխանատու՝ Հասարակագիտական ստուգատեսի համակարգող Վարդան Կարապետեան)։ Կրթահամալիրի աշակերտ Գագիկ Մեսրոպեանը ներկայացուց Մխիթարեան միաբանութեան Հայր Ղեւոնդ Ալիշանի «Սիսական» աշխատութեան նուիրուած զեկոյցը (խորհրդատու ուսուցիչ՝ Աշոտ Տիգրանեան)։ Գեղարուեստական հատուածին մէջ ելոյթ ունեցաւ «Սեբաստացիներ» պատանիներու երգչախումբը (պատասխանատու՝ Սիւզի Մարգարեան)՝ կատարելով «Աղաչեմ զքեզ» եւ «Գովեալ դասուց» հոգեւոր ստեղծագործութիւնները։

Միջոցառման շրջանակէն ներս, Հայաստանի ազգային գրադարանի թամանեանական փոքր ցուցասրահին մէջ կազմակերպուած էր նաեւ նիւթին վերաբերող ցուցադրութիւն։ Հինգ առանձին ցուցափեղկերու մէջ ներկայացուած էին Մխիթարեան միաբանութեան յոբելեաններուն նուիրուած հրատարակութիւններ, միաբանութեան կողմէ լոյս տեսած գիրքեր, Մխիթար Սեբաստացիի գործերը եւ անոր մասին ուսումնասիրութիւններ՝ գիրքեր, թերթեր ու ամսագիրներ։ Միջոցառումը եւս մէկ հնարաւորութիւն էր արժեւորելու Մխիթար Սեբաստացիի եւ Մխիթարեան միաբանութեան բացառիկ դերը հայ մշակոյթի, կրթութեան եւ գրատպութեան զարգացման պատմութեան մէջ։