Հայաստանի ազգային գրադարանէն ներս, Մարտիրոս Սարեանի տուն-թանգարանին հետ համագործակցութեամբ, կայացաւ «Մարտիրոս Սարեան․ վարպետի յիշատակին» խորագրով միջոցառումը՝ նուիրուած հայ մեծանուն նկարիչ Մարտիրոս Սարեանի յիշատակին։ Միջոցառման ծիրէն ներս Հայաստանի ազգային գրադարանի մեծ ցուցասրահին մէջ ներկայացուեցան գրադարանի հաւաքածոներուն մէջ պահպանուող Մարտիրոս Սարեանին նուիրուած գիրքեր, նկարատետրեր, բացիկներ, վարպետին նկարազարդումներով հայերէն եւ օտար լեզուներով հրատարակութիւններ, ինչպէս նաեւ Մարտիրոս Սարեանի տուն-թանգարանի շարք մը հրատարակութիւնները։ Միջոցառման ծիրէն ներս Մարտիրոս Սարեանի տուն-թանգարանը Հայաստանի ազգային գրադարանին նուիրեց վարպետին ստեղծագործութիւններու տարբեր տարիներու ցուցահանդէսներու ազդագիրներու հարուստ հաւաքածոյ, ինչպէս նաեւ տուն-թանգարանի շարք մը նոր հրատարակութիւններ։

ՀԱԳ տնօրէնուհի Աննա Չուլեանը իր խօսքին մէջ ընդգծեց, որ ազդագիրները առանձնայատուկ մշակութային արժէք ունին՝ ոչ միայն որպէս տեղեկատուական նիւթեր, այլ որպէս տարբեր ժամանակաշրջաններու գեղարուեստական մտածողութեան, հաղորդակցութեան եւ մշակութային կեանքի զարգացման կարեւոր վկայութիւններ։ Ատոնք միաժամանակ արժէքաւոր աղբիւր են հետազօտողներուն համար՝ արուեստի պատմութեան, ցուցադրական մշակոյթի եւ մշակութային յիշողութեան ուսումնասիրութեան տեսանկիւնէն։ Հաշուի առնելով այս պարագան՝ Հայաստանի ազգային գրադարանը ձեռնամուխ եղած է ինչպէս սեփական հաւաքածոներուն մէջ պահպանուող, այնպէս ալ նուիրաբերուած ազդագիրներու ամբողջական թուայնացման եւ հանրահռչակման գործընթացին։ Այս նախաձեռնութեան ծիրէն ներս շուտով Հայաստանի ազգային գրադարանի պաշտօնական կայքին վրայ պիտի գործարկուի «Մարտիրոս Սարեան» թուային հաւաքածոն, ուր մէկ միասնական հարթակի վրայ հասանելի պիտի ըլլան ՀԱԳ հաւաքածոներուն մէջ պահպանուող ոչ գրքային հրատարակութիւնները՝ նուիրուած Մարտիրոս Սարեանի ժառանգութեան։

Ողջոյնի խօսքով հանդէս եկան նաեւ Մարտիրոս Սարեանի տուն-թանգարանի տնօրէնուհի Պելլա Իսահակեանը, տուն-թանգարանի գլխաւոր պահեստապետ Սոֆիա Սարեանը եւ տուն-թանգարանի Ցուցադրութիւններու կազմակերպման եւ հանրահռչակման բաժնի վարիչ Ռուզան Սարեանը՝ ընդգծելով մշակութային հաստատութիւններու համագործակցութեան կարեւորութիւնը ազգային մշակութային ժառանգութեան պահպանման, ուսումնասիրման եւ հանրայնացման գործին մէջ։ Միջոցառումը միտուած էր Մարտիրոս Սարեանի ստեղծագործական ժառանգութեան արժեւորման եւ հանրայնացման՝ վերահաստատելով Հայաստանի ազգային գրադարանի եւ Մարտիրոս Սարեանի տուն-թանգարանի արդիւնաւէտ համագործակցութիւնը։