«15 ամիս շարունակ ես կ'արթննայի առաւօտուն ժամը 5:00-ին, գաւաթ մը սեւ սուրճ կը խմէի եւ կը ստեղծէի Ամիրի եւ Հասանի աշխարհը»,- կը յիշէ «Օդապարուկ թռցնողը» վէպին հեղինակ Խալետ Հոսէյնին իր այս գիրքին մասին: Այսօր՝ մարտ 4-ին, աֆղանական ծագումով ամերիկացի գրողին ծննդեան օրն է՝ 60-ամեակը։

Անոր համաշխարհային հռչակ բերած առաջին վէպը՝ «Օդապարուկ թռցնողը», հօր եւ որդիի մը պատմութիւն էր, երկրորդ վէպը՝ «Հազար չքնաղ արեւներ»-ը, մայր-դուստր յարաբերութեան մը պատմութիւն է, որուն հիմնական նիւթը Աֆղանստանի մէջ կանանց իրաւունքներու ոտնահարումն է, անոնց դէմ բռնութիւնն ու դաժանութիւնը։

Հայ ընթերցողը բազմաթիւ նմանութիւններ կրնայ տեսնել Խալետ Հոսէյնիի «Եւ արձագանգեցին լեռները» վէպին հերոսներուն եւ Արցախեան պատերազմէն տուն դարձած զինուորներուն միջեւ։ Վէպին գլխաւոր նիւթերն են՝ ցաւը, սէրը, եղբօր եւ քրոջ միջեւ կապը, ընտանեկան սէրը։ Գիրքը բաղկացած է 9 գլուխներէ։ Իւրաքանչիւր գլուխ կը պատմէ որեւէ առանձին կերպարի մասին։

Վէպի թարգմանիչ Անոյշ Սեդրակեանի խօսքով՝ վէպին գլխաւոր նիւթերէն մէկը ճակատագրի անխուսափելիութիւնն է. «Բոլոր հերոսները բանէ մը կը փախին. մէկը՝ ինքզինքէն, միւսը՝ գաղթէն, երրորդը՝ պատերազմէն, չորրորդը՝ իր սիրոյց... Եւ բոլորը յետոյ կու գան կը յանգին նոյն կէտին՝ ապացուցելով, որ ճակատագրէն չես կրնար փախիլ»։

Խալետ Հոսէյնին հայ ընթերցողին սիրելի հեղինակներէն է, անոր վէպերը միշտ տեղ կը գտնեն գրադարաններուն մէջ ամէնէն շատ ընթերցուած գիրքերու տասնեակներուն մէջ։