Հայաստանի ազգային գրադարանը հանդէս կու գայ նոր նախաձեռնութեամբ՝ հանդիպում հրատարակիչներու հետ՝ «Խորհուրդ կու տան հրատարակիչները. գրքային նորութիւններ» խորագրով։ Այսօր, Էտիթ Փրինթ հրատարակչութեան գլխաւոր խմբագիր Դաւիթ Սամուէլեանի հետ հանդիպմամբ տրուեցաւ նախաձեռնութեան մեկնարկը։ Դաւիթ Սամուէլեանի հետ հանդիպում-քննարկումին մասնակցեցան ինչպէս Ազգային, այնպէս ալ Երեւանի համայնքային շարք մը գրադարաններու աշխատակիցներ։ Ձեւաւորուեցաւ հետաքրքրական քննարկում ընթերցողներու պահանջներու, հետաքրքրութիւններու, գրադարաններու համալրման խնդիրներու, ընթացակարգի եւ այլ հարցերու շուրջ։

Դաւիթ Սամուէլեանը, նաեւ որպէս հեղինակ, ներկայացուց իր հեղինակային հրատարակութիւններէն «Զգուշացէք, դռները չեն գոցուիր» եւ «Մոռցուած երկրի զանգերը»։ «Մոռցուած երկրի զանգերը» վէպին մէջ նկարագրուած են 20-րդ դարուն Նախիջեւանի մէջ տիրող միջցեղային յարաբերութիւնները, նախապատերազմական եւ յետպատերազմական կեանքի դժուարութիւնները, փոփոխութիւններն ու լարուածութիւնը։ (Գիրքը առկայ է Հայաստանի ազգային գրադարանին մէջ եւ հասանելի է ընթերցողին)։

2024 թուականին տպագրուած է Ռեմարքի «Անուրջներու օթեւանը» վէպը՝ Նարինէ Թադէոսեանի թարգմանութեամբ։ Վէպը կը նկարագրէ երիտասարդ արուեստագէտի յուզիչ կերպարը, որ կ'արտացոլէ նոյնինքն Ռեմարքի որպէս գրողի զարգացման ուղին։ Սամուէլեանը ներկայացուց նաեւ Թովմաս Վուլֆի «Հեռաւորն ու մօտիկը» պատմուածքներու ժողովածոն, որ կ'ընդգրկէ մինչ այժմ անգլերէն հրատարակուած ամէնէն ամբողջական՝ Ֆրանսիս Է. Սքիփի կազմած «Պատմուածքներու լիակատար ժողովածոյ»-ի յիսունութ պատմուածքներէն քսանութն։

«Էտիթ Փրինթ» հրատարակչութեան տպագրած նոր թարգմանութիւններուն մասին խօսեցաւ Էմիլ Զոլայի «Խումարան», Հեքթոր Մալոյի «Սիւզան. Օրիորդ Քլիֆթոն» վէպերու, Ժորժ Սիմոնոնի վէպերու թարգմանութիւններու շարքին մասին։ Հրատարակիչին հետ հանդիպումը տուաւ շարք մը յուզող հարցերու պատասխաններ, տեղեկացանք հրատարակչական գործունէութեան առանձնայատկութիւններուն եւ դժուարութիւններուն մասին։ Հետեւեցէք Հայաստանի ազգային գրադարանի ֆէյսպուքեան էջին՝ յաջորդ հանդիպումներուն մասին տեղեկանալու համար։