«Մահս պիտի ըլլայ ոտքի վրայ՝ կեցած, ոչ թէ պառկած՝ անկողինին մէջ», - Հրանդ Տինք: Դեկտեմբեր 20-ին Հայաստանի ազգային գրադարանի Մատենագիտութեան եւ գրադարանագիտութեան բաժնին մէջ տեղի ունեցաւ պատմական գիտութիւններու թեկնածու, դոցենտ Նունէ Սարումեանի դասախօսութիւնը, որ նուիրուած էր պոլսահայ լրագրող, Թուրքիոյ մէջ հայերէն եւ թրքերէն հրատարակուող միակ շաբաթաթերթի՝ «Ակօս»-ի գլխաւոր խմբագիր Հրանդ Տինքի ծննդեան 70-ամեակին։

Միջոցառման ընթացքին Նունէ Սարումեանը ներկայացուց Հրանդ Տինքի կեանքն ու գործունէութիւնը՝ անդրադառնալով անոր ջանքերուն, որոնք միտուած էին երկու հարեւան ժողովուրդներուն միջեւ երկխօսութեան, փոխըմբռնման եւ խաղաղութեան հաստատման։ Բանախօսը յատկապէս շեշտեց Տինքի աշխատանքին կարեւորութիւնը թուրք-հայկական յարաբերութիւններու բարելաւման եւ Հայոց ցեղասպանութեան ճանաչման գործին մէջ։

Դասախօսութեան ընթացքին հնչեցին Տինքի առաւել յայտնի մտքերը, որոնք կը շարունակեն ոգեւորել սերունդները՝ Տինքի նման համարձակ ու պայքարող ըլլալու եւ յանուն վաղուան օրուան։

Միջոցառման ցուցադրուեցան պարբերական մամլոյ մէջ հրատարակուած նիւթեր։ Տինքի ծննդեան 70-ամեակի առթիւ մատենագիտութեան բաժինը մեթոտամատենագիտական ցանկ մը պատրաստած է, որ կ'ամփոփէ Հայաստանի եւ սփիւռքի հայ մամլոյ մէջ 2005-2024 թուականներուն հրատարակուած Հրանդ Տինքի եւ անոր մասին գիրքեր, յօդուածներ, թղթակցութիւններ, մամլոյ հաղորդագրութիւններ։ Ցանկը շուտով պիտի հրապարակուի Ազգային գրադարանի հրատարակութիւններու թուային հարթակին վրայ։