Ղրղզստանի Հանրապետութեան Ազգային պատմութեան թանգարանի 100-ամեակին նուիրուած՝ «Յիշողութեան հիմնարկներ, գիրք եւ ընթերցանութիւն տեղեկատուական հասարակութեան մէջ» խորագրով 4-րդ միջազգային գիտագործնական գիտաժողովը համախմբեց մշակոյթի, գրահրատարակչութեան, կրթութեան եւ տեղեկատուական ոլորտներու մասնագէտներ 10 երկրներու գրադարաններէն, թանգարաններէն ու գիտական հաստատութիւններէն։

Հայաստանը գիտաժողովին ներկայացուցած է Հայաստանի ազգային գրադարանի աշխատակից Սարա Զոհրապեանը, որ հանդէս եկած է «Հայ գրականութիւնը թարգմանութիւններուն մէջ՝ որպէս մշակութային երկխօսութեան կամուրջ» խորագրով զեկոյցով։ Զեկուցման ընթացքին ներկայացուած է հայ գրականութեան միջազգային ներկայացման գործընթացը, թարգմանական քաղաքականութեան ռազմավարական նշանակութիւնը եւ «Հայ գրականութիւնը թարգմանութիւններուն մէջ» պետական ծրագրի արդիւնքները՝ որպէս միջմշակութային փոխըմբռնման եւ համագործակցութեան գործիք։

Գիտաժողովի ընթացքին քննարկուած են յիշողութեան հիմնարկներու, ընթերցանութեան եւ գիրքի դերի արդիական հարցեր ժամանակակից տեղեկատուական հասարակութեան մէջ՝ ներառեալ թուային վերափոխման գործընթացները, մշակութային ժառանգութեան պահպանման ու մատչելիութեան ապահովման նոր մօտեցումները, ինչպէս նաեւ ընթերցանութեան խթանման եւ մետիագրագիտութեան զարգացման մարտահրաւէրները։ Գիտաժողովը կայացած է հոկտեմբեր 9-10-ին՝ Պիշքեքի մէջ։