Ազգային գրադարանէն ներս սկիզբ առին Ազգային գրադարանային շաբթուան միջոցառումները։ «Եղիշէ Չարենցը եւ հայ գրքարուեստը» խորագիրով հանրային դասախօսութիւն մը կազմակերպած էր Հայաստանի Գիտութեանց ազգային ակադեմիոյ Արուեստի հիմնարկի աւագ գիտաշխատող, արուեստագիտութեան թեկնածու Արթուր Աւագեանը։  

 
Բանախօսը ներկայացուց 1928-1935 թուականներուն Չարենցի բեղուն գործունէութիւնը՝ որպէս Հայաստանի պետական հրատարակչութեան գեղարուեստական բաժինի վարիչ։ Աւագեանը յատուկ անդրադարձ մը կատարեց Չարենցի համագործակցութեան ժամանակի աւագ սերունդի նկարիչներու՝ Մարտիրոս Սարեանի եւ Յակոբ Կոջոյեանի, ինչպէս նաեւ իր հասակակիցներու՝ Տաճատ Խաչվանքեանի եւ Միքայէլ Արուտչեանի հետ, անոնց թողած հարուստ հրատարակչական ժառանգութիւնը, որ կ’առանձնանայ գիրքի ինքնատիպ ձեւաւորումներով, հրատարակչական նորարար լուծումներով։   
Գրադարանը յառաջիկային կը ծրագրէ կազմակերպել հայ գրքարուեստին եւ գրահրատարակչական գործին նուիրուած մի քանի դասախօսութիւն եւս։