Ապրիլ 14-ին ՀԱԳ աշխատակիցներ Ներսէս Հայրապետեանը, Մայա Հայրապետեանն ու Անիցա Կենճեան #Ազգային_գրադարանային_շաբթուան ծրագրի շրջանակէն ներս աշխատանքային այցելութեամբ Գեղարքունիքի մարզը կը գտնուէին։ Այցելութեան շրջանակէն ներս համագործակցութեան եւ գրքափոխանակութեան բաժնի տարեկան հատուցման հաշուոյն Գեղարքունիքի Վարդգէս Պետրոսեանի անուան մարզային գրադարանը, ինչպէս նաեւ 7 համայնքային եւ Գեղարքունիք գիւղի միջնակարգ դպրոցի գրադարանը համալրուեցան շուրջ 400 միաւոր գրականութեամբ։ Ազգային գրադարանի աշխատակիցները մասնակցեցան Գեղարքունիքի մարզային գրադարանի կազմակերպած «Գիրք, հեքիաթ եւ երգ» խորագրով միջոցառման։

Ներսէս Հայրապետեանը իր ողջոյնի խօսքին մէջ, կարեւորելով ժամանակակից հասարակութեան մէջ գրադարաններու դերը, ընդգծեց, որ գրադարանները միայն գիրքերու պահոցներ չեն, այլ գիտելիքի տարածման, կրթութեան խթանման եւ համայնքային կեանքի կարեւոր կեդրոններ։ Ան իր խօսքին մէջ անդրադարձաւ նաեւ համայնքային եւ դպրոցական գրադարաններու մէջ նորարարական մօտեցումներու կիրառման անհրաժեշտութեան՝ նշելով, որ ժամանակակից գրադարանները պէտք է քալեն թուային դարաշրջանին համընթաց, զարգացնեն ծառայութիւնները եւ ապահովեն տեղեկատուութեան առաւել լայն եւ հաւասար հասանելիութիւն բոլորին համար։

Ներսէս Հայրապետեանը յատկապէս կարեւորեց նման նախաձեռնութիւններու շարունակականութիւնը՝ ընդգծելով, որ մարզային եւ համայնքային գրադարաններու հզօրացումը մեծ դեր ունի ընթերցանութեան մշակոյթի պահպանման եւ զարգացման գործին մէջ։