Տպագիր արտադրանքի վերականգնումը շատ կարեւոր է մշակութային ժառանգութեան պահպանման տեսանկիւնէն։ Ըստ Գրադարաններու եւ գրադարանային գործի մասին Հայաստանի օրէնքի՝ Հայաստանի ազգային գրադարանը կ’ապահովէ ֆիզիկապէս մաշած, եզակի եւ (կամ) հազուագիւտ գրաւոր յուշարձաններու, գրադարանային փաստաթուղթերու ամրակայումը եւ վերականգնումը։ Ազգային գրադարանի այդ գործառոյթը լաւագոյնս իրականացնելուն կը նպաստեն նաեւ մասնագիտական դասընթացներն ու սեմինարները։ Գրադարանին աշխատակիցները՝ տպագիր արտադրանքի վերականգնման բաժնի վերականգնող Անոյշ Ղազարեանը եւ համալրման բաժնի գրադարանավար Տաթեւիկ Ղամպարեանը յուլիս 22-էն օգոստոս 3 մասնակցած են Ռուսիոյ պետական գրադարանի կազմակերպած «Դասական թերթային վերականգնում» դասընթացին եւ որակաւորման հաւաստագիրներ ստացած են Ռուսիոյ պետական գրադարանէն։

Անոնք այսօր հաշուետուութիւն ներկայացուցին վերապատրաստման դասընթացին վերաբերեալ, շարք մը մասնագիտական մանրամասներ պատմեցին երկշաբաթեայ դասընթացէն, խօսեցան մասնագիտական փորձառութեան, ինչպէս նաեւ իրենց քաղած օգտակար գաղափարներուն մասին, այնուհետեւ պատասխանեցին գործընկերներուն հարցերուն։