#Գիրք_նուիրելու_օր Փետրուար 19-ին Հայաստանի ազգային գրադարանէն ներս կայացաւ «Գիրք նուիրելու օրը՝ Ազգայինէն ներս» միջոցառումը։ Արդէն չորրորդ տարին ըլլալով Հայաստանի ազգային գրադարանը, ինչպէս նաեւ շարք մը մարզային եւ համայնքային գրադարաններ, Գիրք նուիրելու օրուան առթիւ Հայաստանի Նախագահին անունով կը ստանան գրքային նուիրատուութիւններ։

Նախաձեռնութեան ծիրէն ներս, այս տարի Հայաստանի ազգային գրադարանը, 16 համայնքային եւ 3 դպրոցական գրադարաններ օժտուեցան նոր հրատարակուած եւ պահանջ վայելող գրականութեամբ՝ նպաստելով գրադարանային հաւաքածոներու հարստացման ու ընթերցողական հետաքրքրութեան խթանման։ Միջոցառման բացման եւ ողջոյնի խօսքով հանդէս եկաւ Հայաստանի ազգային գրադարանի տնօրէնուհի Աննա Չուլեանը՝ ընդգծելով գիրքին ու ընթերցանութեան դերն ու գրադարաններու շարունակական զարգացման կարեւորութիւնը։ Շնորհաւորական խօսքով ներկայացաւ Հայաստանի նախագահի աշխատակազմի ռազմավարական նախաձեռնութիւններու եւ վերլուծութիւններու բաժնի պետ Լիպարիտ Մելքոնեանը՝ ընդգծելով, որ ընթերցանութեան խթանումը կրթուած ու մրցունակ հասարակութիւն ձեւաւորելու կարեւոր պայմաններէն է։ Ան կարեւորեց յատկապէս երիտասարդ սերունդի շրջանէն ներս գիրքի հանդէպ հետաքրքրութեան ամրապնդումը։Միջոցառման ընթացքին «Ինեքո» դրամատան Գործատուի վաճառանիշի կառավարման բաժնի ղեկավար Էլինա Ստեփանեանը եւս խօսեցաւ գրադարանին հետ համագործակցութեան կարեւորութեան եւ յետագայ ծրագիրներուն մասին։ «Ինեքո» դրամատունը գիրքեր նուիրեց Հայաստանի ազգային գրադարանին եւ հինգ դպրոցական գրադարաններու՝ աջակցելով կրթական գործընթացին եւ դպրոցականներու շրջանէն ներս ընթերցանութեան տարածման։ Գրադարաններուն գիրքեր նուիրելու նախաձեռնութեան կարեւորութեան մասին խօսեցաւ նաեւ ՀԱԳ աշխատակից Ներսէս Հայրապետեանը՝ ընդգծելով, որ նման ծրագիրներ կը նպաստեն գրադարանային պահուստներու հարստացման եւ ընթերցանութեան մշակոյթի ամրապնդման համայնքներուն մէջ։

Միջոցառման աւարտին մարզային եւ համայնքային գրադարաններու ներկայացուցիչները եւս հանդէս եկան շնորհակալական խօսքերով՝ կարեւորելով նախաձեռնութեան շարունակականութիւնն ու համագործակցութեան ընդարձակումը։ Գիրք նուիրելու օրը գրքառատ էր նաեւ Հայաստանի ազգային գրադարանի ընթերցողներուն համար. ամբողջ օրուան ընթացքին նոր ընթերցողները անակնկալ նուէրներ ստացան, իսկ Թամանեանական մասնաշէնքի նախամուտքին մէջ ընթերցողները հնարաւորութիւն ունեցան ընտրելու եւ իրենց հետ տանելու նուէր գիրքեր։