Հայաստանի ազգային գրադարանի տնօրէնուհիի տեղակալ Հայկանոյշ Ղազարեանը եւ Գրատպութեան թանգարանի զբօսավար Մարթա Մկրտչեանը վերջերս մասնակցեցան Ղրղզստանի Հանրապետութեան մայրաքաղաք Պիշքեկի մէջ տեղի ունեցած «Յիշողութեան համակարգերը, գիրքը եւ ընթերցանութիւնը տեղեկատուական հանրոյթէն ներս» 3-րդ միջազգային գիտաժողովին։ Ազգային գրադարանի աշխատակիցները գիտաժողովին հանդէս եկան «Ընթերցանութեան խթանման նոր միտումները՝ Հայաստանի ազգային գրադարանի օրինակով» եւ «Հայկական տպագիր ժառանգութեան հանրահռչակում. Google Arts & Culture» զեկուցումներով։  

 

Գիտաժողովը կ'առանձնանար մասնակիցներուն աշխարհագրական ընդգրկուածութեամբ եւ քննարկուած նիւթերուն բազմազանութեամբ՝ «Թուային դարաշրջանին՝ թուային եւ մշակութային ժառանգութեան հանրայնացում», «Գրադարանները եւ ընթերցանութեան խթանումը թուային դարաշրջանին», «Ընթերցանութիւնը եւ կրթութիւնը թուային դարաշրջանին», «Ժամանակակից թուային հասարակութեան յիշողութեան համակարգերը», «Գրական եւ մշակութային ժառանգութիւնը տեղեկատուական հասարակութեան մէջ», «Ընթերցանութեան խթանումը երեխաներու եւ երիտասարդութեան շրջանէն ներս»։ Գիտաժողովին շրջանակէն ներս տեղի ունեցաւ նաեւ Ճենկիզ Այթմաթովի ծննդեան 95-ամեակին նուիրուած քննարկում մը՝ «Թանգարանային գործը եւ մշակութային արժէքներու պահպանութիւնը» խորագիրով։  
Գիտաժողովը կազմակերպուած էր Եունեսքոյի «Տեղեկատուութիւն բոլորին համար» ծրագրի Ռուսական կոմիտէի, Անկախ պետութեանց համագործակցութեան Մարդասիրական համագործակցութեան միջպետական հիմնադրամի (МФГС), Ղազախստանի Հանրապետութեան Պատմութեան ազգային թանգարանի եւ այլ կազմակերպութիւններու համատեղ ջանքերով։ Գիտաժողովին մասնակցիլը հնարաւորութիւն տուաւ ծանօթանալու գործընկեր հաստատութիւններու փորձին, հանրայնացնելու Հայաստանի ազգային գրադարանէն ներս մշակութային յիշողութեան ուղղուած աշխատանքները։