Սինէ-ակումբի այսօրուան հանդիպման ընթացքին ցուցադրուեցաւ ֆրանսացի բեմադրիչ Պրունո Տիւմոնի «Ֆլանտրիա» ֆիլմը։ Այս գործը հանդիսատեսը կը տեղափոխէ աշխարհ մը, ուր լռութիւնը յաճախ աւելի խօսուն է, քան բառերը։ Անտրէի եւ Պարպէի յարաբերութիւններու պատմութիւնը կը վերածուի ներքին լարուածութեան ու չարտայայտուած զգացումներու տրամայի, որ կը շարունակուի արդէն պատերազմի դաժան իրականութեան մէջ։

Տիւմոնը կը ստեղծէ ուժեղ հակադրութիւն՝ գիւղական հանդարտ միջավայրի եւ անանուն պատերազմի սարսափներուն միջեւ՝ ցոյց տալով մարդկային բնոյթի երկակիութիւնը։ Ֆիլմը ոչ միայն պատերազմի մասին է, այլեւ մարդու ներսը տեղի ունեցող պայքարին, ուր սէրը, ցաւն ու բռնութիւնը երբեմն կը խառնուին իրար։ «Ֆլանտրիա»-ն ներկայացուած է Քաննի միջազգային ֆիլմի փառատօնին եւ արժանացած է «Grand prix» մրցանակին։

Սինէ-ակումբի ֆիլմերու ցուցադրութիւններուն կը յաջորդէ քննարկում, որուն ընթացքին մասնակիցները կ'անդրադառնան գործի գաղափարներուն, կերպարներու հոգեբանական խորութեան եւ բեմադրիչի շարժապատկերային լեզուին։ Սինէ-ակումբը կը շարունակէ բացայայտել ֆրանսական շարժապատկերի նշանակալի ստեղծագործութիւնները։