Բրիտանացի գրող Ռութ Ռենտէլը այսպէս սկսած է իր «Քարէ դատավճիռ» վէպը. «Եւնիքէ Փարչմանը սպանեց Քովերտէյլ ընտանիքը, որովհետեւ գրել-կարդալ չէր գիտեր»: Ֆրանսական նոր ալիքի ամէնէն վառ ներկայացուցիչներէն մէկը՝ Քլոտ Շապրոլը զարգացուց Ռենտէլի՝ 1977-ին ստեղծած այս արկածախնդրական հոգեցունց մտքերը: Շապրոլը Ակաթա Քրիստիի արժանաւոր հետեւորդ եւ Էտկար Փոյի մրցանակի բազմակի դափնեկիր գրողի վէպի հիման վրայ 1995-ին նկարահանեց իր գլուխգործոցը՝ «Արարողութիւն» հոգեբանական սարսափ ֆիլմը:

Ճիշդ այս ֆիլմն ալ Հայաստանի ազգային գրադարանէն ներս՝ Սինէ-ակումբի հերթական ցուցադրութեան դիտեցին ֆիլմասէրները։ Մեծ յափշտակութեամբ դիտուած ֆիլմը բուռն քննարկումներու առարկայ դարձաւ: «Աս ի՛նչ էր, աս ի՛նչ կ’ընէ աս մարդը, աս ի՛նչ խենթութիւն էր»,- այս հռետորական հարցն էր ֆիլմ դիտողի շուրթերուն: ֆիլմի դիտումէն ցնցուած հանդիսատեսները կ’ընդգծէին, թէ համոզուեցան, որ Քլոտ Շապրոլը իրօք հոգեբանութեան տեսանկիւնէն ամէնէն սարսափելի ֆիլմերը ստեղծած է: «Շապրոլը ամէնէն սովորական իրավիճակները սարսափի, սարսափելի հանգուցալուծման կը յանգեցնէ»,- հիացած նշած էր ֆիլմասէր կին մը:

Պատահական չէ, որ Իզապէլ Եուփէրի եւ Սանտրին Պոներիի գլխաւոր դերակատարմամբ ֆիլմը բազմաթիւ հեղինակաւոր մրցանակներ շահած է. Վենետիկի ֆիլմի փառատօնի, Թորոնթոյի ֆիլմի փառատօնի, Սեզար մրցանակ եւ այլն։ Սինէ-ակումբը Հայաստանի ազգային գրադարանէն ներս կը գործէ արդէն երրորդ տարին ըլլալով` «Ֆիլմադարան» ֆիլմի մշակոյթի զարգացման հասարակական կազմակերպութեան, Ազգային գրադարանի, Հայաստանի Ֆրանսայի դեսպանութեան Ֆրանսական հիմնարկի համագործակցութեամբ` ֆիլմասէրներուն ներկայացնելով ֆրանսական ֆիլմերու ընտրանին։

Ֆիլմերը կը ցուցադրուին ֆրանսերէն՝ հայերէն եւ անգլերէն ենթագիրներով։ Սինէ ակումբի հերթական ցուցադրութիւնը սեպտեմբեր 24-ին, ժամը՝ 19:00-ին է: Մուտքը ազատ է։