Հայաստանի ազգային գրադարանի թամանեանական մեծ դահլիճէն ներս Սինէ-ակումբի նախաձեռնութեամբ տեղի ունեցաւ ֆրանսացի ֆիլմի բեմադրիչ Ֆրանսուա Թրիւֆոյի «400 հարուած» ֆիլմին ցուցադրութիւնը։ Ֆիլմի ցուցադրութեան ներկայ էին ֆիլմ սիրողները եւ ֆրանսական ֆիլմի երկրպագուները։ Գարեգին Զաքոյեանը մինչ ֆիլմի ցուցադրութիւնը հանդիսատեսին ներկայացուց Ֆ. Թրիւֆոյի ֆիլմերը, որոնք անոր փառք եւ յաջողութիւն բերած են, վերջինս ընդգծեց, որ «400 հարուած» ֆիլմը կը համարուի ֆրանսական «Նոր ալիքի» դասական նմուշ մը։ Այն Ֆ. Թրիւֆոյի առաջին մեծ յաջողութիւնն էր։ Ֆրանսացի բեմադրիչ Ֆրանսուա Թրիւֆոն մեծ ֆիլմային ժառանգութիւն թողած է, որոնց արդիականութիւնը պիտի խոստովանին նաեւ ապագայ սերունդները։ Թրիւֆոն ֆրանսական ֆիլմարուեստի դասականներէն է, որուն մտածողութիւնն ու հայեացքը ձգուած են դէպի մեր հազարամեակ։

Հանդիսատեսը մեծ հետաքրքրութեամբ եւ ոգեւորութեամբ դիտեց «400 հարուած» ֆիլմը, որ կը պատմէր տասներկամեայ Անթուան Տուանէլի մասին, որ «դժուար դեռահասի» դասական օրինակ մըն է, սակայն անոր արարքները թերեւս ըլլային պակաս անկանխատեսելի, եթէ մշտապէս բազմազբաղ մայրը փորձէր հասկնալ զինք եւ աւելի շատ ժամանակ եւ ուշադրութիւն յատկացնէր։ Անթուանի խորթ հայրը իր թոյլ բնաւորութեան պատճառաւ չի կրնար իր անձնական կարծիքը լսելի դարձնել ո՛չ կնոջ, ո՛չ ալ տղուն համար, իսկ դպրոցի ուսուցիչը բոլոր խնդիրները կը լուծէ տղան պատժելու միջոցաւ։ Սինէ-ակումբը կը կազմակերպէ «Ֆիլմադարան» ֆիլմի մշակոյթի զարգացման հասարակական կազմակերպութեան՝ Հայաստանի ազգային գրադարանի, Հայաստանի մէջ Ֆրանսայի դեսպանութեան եւ Ֆրանսական հիմնարկի աջակցութեամբ։