Յունիս 14-16-ին Լիւքսեմբուրկի մէջ տեղի ունեցաւ Եւրոպայի Ազգային Գրադարաններու Համաժողովին (CENL) տնօրէններու տարեկան ընդհանուր ժողովը։ 1986-էն ի վեր CENL-ը կը համախմբէ Եւրոպայի ազգային գրադարանները։ Այս տարուան՝ «Ոգեկոչելով ապագան» խորագիրին ներքոյ քննարկուեցան ազգային գրադարաններու զարգացման միտումները՝ ներկայ մարտահրաւէրներու լոյսին տակ։ Յատկապէս անդրադարձ կատարուեցաւ ազգային գրադարաններու դերին՝ Եւրոպայի մշակութային ժառանգութեան պահպանման գործին մէջ, մշակութային ժառանգութեան հաստատութիւններու անվտանգութեան եւ պաշտպանութեան, Եւրոպայի լեզուական բազմազանութեան, ինչպէս նաեւ մշակութային ժառանգութեան՝ արհեստական բանականութեան դարաշրջանին մէջ ունեցած տեղին եւ նշանակութեան։

Հայաստանի Ազգային Գրադարանին տնօրէն Աննա Չուլեան ներկայացուց «Ազգային լեզուի պահպանումը մետատուեալներու համակցման միջոցով (Հայաստանի փորձը համաշխարհային մատենագիտական համակարգերուն մէջ)» թեմայով զեկոյց մը՝ ներկայացնելով Հայաստանի Ազգային Գրադարանին փորձառութիւնն ու միջազգային մատենագիտական համակարգերուն մէջ հայկական լեզուական եւ մշակութային ժառանգութեան ներկայացման ուղղութեամբ իրականացուող աշխատանքները։ Համաժողովին ընթացքին քննարկուեցաւ նաեւ ազգային գրադարաններուն մէջ արհեստական բանականութեան կիրառման բարոյագիտական ուղեցոյցի նախագիծը՝ շեշտելով թափանցիկութեան, հեղինակային իրաւունքներու պահպանման, մարդկային վերահսկողութեան եւ պատասխանատու կիրառման սկզբունքներուն կարեւորութիւնը։

Համաժողովի արդիւնքներով վերահաստատուեցաւ ազգային գրադարաններու միջեւ համագործակցութեան խորացման, մշակութային ժառանգութեան պահպանութեան եւ արհեստական բանականութեան պատասխանատու կիրառման կարեւորութիւնը։