Հայաստանի մէջ այս օրերուն տեղի կ’ունենայ «Էրազմուս օրեր 2024» տօնակատարութիւնը, որ պիտի շարունակուի մինչեւ հոկտեմբեր 19։ Հայաստանի ազգային գրադարանէն ներս Էրազմուսի օրերու շրջանակէն ներս հոկտեմբերի 15-ին տեղի ունեցաւ Հայաստանի մէջ «Էրազմուս առաւել» ազգային գրասենեակի եւ «Էրազմուս ուսանողական ցանց Հայաստան / ESN Armenia)»-ի կազմակերպած «Erasmus+4ME․ բացայայտիր «Էրազմուս առաւել»-ի հնարաւորութիւնները քեզի համար» միջոցառումը:

Միջոցառման բացման խօսքին մէջ Հայաստանի մէջ Եւրոպական միութեան դեսպան Վասիլիս Մարակոսը ընդգծեց, որ «Էրազմուս առաւել» ծրագիրը, մեկնարկէն ի վեր, միլիոնաւոր ուսանողներու եւ մասնագէտներու սորվելու, վերապատրաստուելու եւ աշխատանքային փորձ ձեռք բերելու հնարաւորութիւն տուած է։ Միջոցառման ողջոյնի խօսքով հանդէս եկաւ Ազգային գրադարանի տնօրէնուհի Աննա Չուլեանը։ Հայաստանի ազգային գրադարանը կը կարեւորէ որակեալ, շարունակական՝ ցկեանս կրթութեան ապահովումը եւ երիտասարդական նախագիծերու յառաջխաղացումը՝ պատրաստակամ աջակցելու կրթական ծրագիրներուն եւ նախաձեռնութիւններուն, Եւրոպական միութեան ծրագիրներուն։

Եւրոպական միութեան «Էրազմուս / Erasmus» ուսանողներու եւ դասաւանդողներու փոխանակման ծրագիրը կը գործէ արդէն շուրջ 40 տարիէ ի վեր։ 10 տարի առաջ մեկնարկած «Էրազմուս առաւել»-ը կը միաւորէ ԵՄ կրթութեան, վերապատրաստման, երիտասարդութեան ու մարմնամարզութեան համար ներկայիս գործող բոլոր տարբերակները։