Եղիշէ Չարենցի ծննդեան օրուան առթիւ Հայաստանի ազգային գրադարանէն ներս մեկնարկեց նոր մշակութային նախագիծ մը՝ «Ձայնադարանը», որ կ'իրականացուի «ԱՐԱՐ» երգչախումբին հետ համատեղ։ Նախագիծը մեկնարկեց չարենցեան խօսքերու հիման վրայ ստեղծուած խմբերգերու ներկայացմամբ։ Ողջունելով ներկաները՝ ՀԱԳ տնօրէնուհի Աննա Չուլեանը անդրադարձաւ նաեւ նախաձեռնութեան կարեւորութեան։ Անոր խօսքով՝ Հայաստանի ազգային գրադարանը սիրով արձագանգած է «ԱՐԱՐ» երգչախումբի ղեկավար եւ խմբավար Գոռ Մելքումեանի առաջարկին՝ նախագիծը կեանքի կոչելու Ազգային գրադարանէն ներս։ Այսօր Երեւանի ընթերցասէր երիտասարդութիւնը իր օրուան զգալի մասը կ'անցընէ նոյնինքն Ազգայինի մէջ, եւ նման նախաձեռնութիւնները հնարաւորութիւն կու տան գրադարանի մշակութային միջավայրը հարստացնել նոր ձեւաչափերով։

Նախագծի գաղափարի, երգչախումբի ոգեւորութեան եւ յետագայ ծրագիրներու մասին խօսեցաւ նաեւ Գոռ Մելքումեանը՝ ընդգծելով, որ «Ձայնադարանը» շարունակական նախաձեռնութիւն է եւ յետագային կը համալրուի նոր ստեղծագործութիւններով՝ ընթերցողներուն հնարաւորութիւն տալով գրականութիւնը բացայայտել նաեւ երաժշտութեան միջոցաւ։ Այսուհետեւ ընթերցողները հնարաւորութիւն ունին գրադարանի մեծ ցուցասրահին մէջ ազատօրէն օգտուելու «Ձայնադարանէն» եւ ունկնդրելու Եղիշէ Չարենցի բանաստեղծութեան հիման վրայ ստեղծուած խմբերգերը՝ «ԱՐԱՐ» երգչախումբի կատարմամբ։ Ձայնադարանին մէջ արդէն ներառուած են հայ ժամանակակից երգահաններու ստեղծագործութիւններ՝ Տիգրան Մանսուրեանի «Աշնանային», «Ես իմ անոյշ Հայաստանի» եւ Արեգ Լուսինեանի «Բոլորը քեզ» խմբերգերը։

Միջոցառման աւարտին երգչախումբը Ազգային գրադարանի մեծ ցուցասրահին մէջ ներկայացուց նաեւ քանի մը կատարում իր երգացանկէն՝ հանդիսատեսին պարգեւելով երաժշտութեամբ լեցուն հաճելի եւ յիշարժան պահեր։ Գրադարանի մեծ ցուցասրահին մէջ ներկայացուած էր նաեւ Եղիշէ Չարենցի հարուստ ֆիլմագրական ժառանգութեան ցուցադրութիւնը։