Գիրք նուիրելու օրը՝ փետրուար 19-ին, Հայաստանի ազգային գրադարանի թամանեանական մեծ դահլիճին մէջ գրքատօնին նուիրուած միջոցառման հրաւիրուած էին մեր գործընկեր հրատարակիչներ, գրադարանի նուիրատուներ, հանրապետութեան մարզային եւ համայնքային գրադարաններու աշխատողներ, գիրքի, ընթերցանութեան եւ գրադարաններու աջակիցներ։ Բացման խօսքին մէջ ՀԱԳ տնօրէնուհի Աննա Չուլեանը, ներկաները ողջունելով, կարեւորեց գիրք նուիրելու օրուան խորհուրդը։

Ազգային գրադարանէն ներս Գիրք նուիրելու օրը յատկանշական էր աւելի քան 15 մարզային եւ համայնքային գրադարաններու համար, որոնք վերջին տարիներուն լոյս տեսած արժէքաւոր գեղարուեստական, ոչ գեղարուեստական եւ մանկական գրականութիւն նուէր ստացան Հայաստանի Նախագահի աշխատակազմի կողմէ։ Նախագահի խորհրդական Վահրամ Տումանեանը իր խօսքին մէջ ընդգծեց, որ Հայաստանի նախագահի՝ հանրապետութեան գրադարաններուն գիրքեր նուիրելու այս նախաձեռնութիւնը, երրորդ տարին անընդմէջ իրականացուելով, արդէն կարելի է ըսել, որ աւանդոյթ դարձած է։

Միջոցառման ընթացքին Աննա Չուլեանը հրապարակեց երեք հրատարակչութիւններու անունները, որոնք 2024 թուականին անթերի կատարած են Ազգային գրադարանային հաւաքածոյի հանդէպ ունեցած պարտաւորութիւնները եւ իրենց հրատարակած գիրքերէն պարտադիր օրինակներ յանձնած են Ազգային գրադարանին. անոնց յանձնուեցան «տարուան օրինապահ հրատարակիչ» վկայագրեր եւ հայերէն առաջին քարտէսի՝ «Համատարած աշխարհացոյց»-ի օրինակներ։

Միջոցառման գեղարուեստական բաժնին մէջ ելոյթ ունեցան «Մաէսթրո» մշակութային կազմակերպութեան «Բիւր աստղ» ծրագրին սաները: Ազգային գրադարանէն ներս գրքատօնը կը շարունակուի։