p style="text-align:center;">

Հայաստանի մէջ համայնքային գրադարաններու գրադարանավարներու մասնագիտական վերապատրաստումը կարեւոր նշանակութիւն ունի ժամանակակից եւ արդիւնաւէտ գրադարանային համակարգի ձեւաւորման գործին մէջ։ Տեղական համայնքներուն մէջ գործող գրադարանները ոչ միայն տեղեկատուութեան եւ գիտելիքի տարածման կեդրոններ են, այլեւ կրթական, մշակութային եւ հանրային կեանքի աշխուժ հարթակներ, ուստի ոլորտի մասնագէտներու շարունակական վերապատրաստումը ժամանակի պահանջ է։ Հայաստանի ազգային գրադարանը պարբերաբար կը կազմակերպէ գրադարանավարներու մասնագիտական վերապատրաստման դասընթացներ՝ նախապէս իրականացնելով կարիքներու գնահատում՝ հաշուի առնելով համայնքային գրադարանավարներու կողմէ ներկայացուած առաջնահերթ նիւթերն ու մասնագիտական հետաքրքրութիւնները։

Յունիս 8-9-ին Հայաստանի ազգային գրադարանէն ներս տեղի ունեցաւ երկօրեայ մասնագիտական վերապատրաստման հերթական դասընթաց՝ Հայաստանի համայնքային գրադարաններու գրադարանավարներու մասնակցութեամբ։ Դասընթացին մասնակցեցան Եղուարդի կեդրոնական գրադարանի, Գաւառի, Վետիի եւ Հրազդանի շարք մը համայնքային գրադարաններու գրադարանավարներ։ Մասնակիցներուն ներկայացուեցան ժամանակակից գրադարանային գործունէութեան վերաբերող շարք մը կարեւոր նիւթեր։ Քննարկուեցան ապագային միտուած համայնքային գրադարաններու զարգացման միտումները, համայնքային գրադարաններու պահուստներու ելեկտրոնային հաշուառման եւ գոյքագրման գործընթացները, գրադարաններուն մէջ անձնական տուեալներու պաշտպանութեան հիմնահարցերը, ինչպէս նաեւ գրադարանային օրէնսդրութեան եւ ենթաօրէնսդրական կանոնական վճիռներու կիրառման առանձնայատկութիւնները։

Առանձին ուշադրութիւն դարձուեցաւ Հայաստանի գրադարաններու համահաւաք գրացուցակէն օգտուելու հնարաւորութիւններուն եւ Հայաստանի ազգային գրադարանի շտեմարաններու կիրառման գրադարանային գործընթացներուն մէջ։ Դասընթացները վարեցին Հայաստանի ազգային գրադարանի փորձառու մասնագէտները՝ մասնակիցներուն հետ համատեղ կազմակերպելով նաեւ քննարկումներ եւ գործնական աշխատանքներ։ Վերապատրաստման աւարտին կատարուեցաւ արդիւնքներու գնահատում։ ՀԱԳ տնօրէնի գիտական գծով տեղակալ Հայկանոյշ Ղազարեանը մասնակիցներուն յանձնեց դասընթացի մասնակցութեան հաւաստագիրներ։ Դասընթացի աւարտին մասնակիցները շրջեցան նաեւ Հայաստանի ազգային գրադարանի գրատպութեան թանգարանը, ծանօթացան հայկական գրատպութեան պատմութեան, ինչպէս նաեւ գրատպական մշակոյթի զարգացման կարեւոր փուլերուն։