Այսօր Հայաստանի ազգային գրադարանի Սինէ-ակումբէն ներս ցուցադրուեցաւ «Այրող աղջկան դիմանկարը» ֆիլմը, որ համախմբած էր շուրջ 100 ֆիլմասէրներ։ ֆիլմը՝ բեմադրիչ Սելին Սիամայի հեղինակութեամբ, կը համարուի ժամանակակից ֆրանսական շարժապատկերի առաւել նուրբ ու ազդեցիկ գործերէն մէկը։ Այն արժանացած է Քաննի ֆիլմի փառատօնի «Լաւագոյն բեմագրութիւն» մրցանակին՝ հաստատելով իր առանձնայատուկ տեղը համաշխարհային ֆիլմարուեստին մէջ։

ֆիլմը, որ մեզ կը տեղափոխէ 18-րդ դարու Ֆրանսա, կը բացայայտէ արուեստագէտի եւ բնորդուհիի միջեւ ձեւաւորուող նուրբ հոգեբանական կապը՝ վերածելով զայն յիշողութեան, դիտման եւ ինքնութեան մասին խորքային պատմութեան։ Յատկանշական է, որ ֆիլմին մէջ գրեթէ կը բացակայի երաժշտական ուղեկցութիւնը․ լռութիւնը այստեղ կը դառնայ արտայայտման միջոց՝ ընդգծելով կերպարներու ներքին լարուածութիւնն ու զգացական աշխարհը։ Միեւնոյն ատեն իւրաքանչիւր երիզ կառուցուած է գեղանկարչական ճշգրտութեամբ՝ ստեղծելով տեսողական ինքնուրոյն արժէք։

Սինէ-ակումբի այս հանդիպումը անգամ մը եւս ընդգծեց գրադարանի դերը՝ իբրեւ մշակութային կենդանի միջավայր, ուր կը հանդիպին գրականութիւնը, շարժապատկերը եւ մտքի ազատ փոխանակումը։