Գիրք նվիրելու օրվան ընդառաջ Ազգային գրադարանում այսօր հանդիպում էր կազմակերպվել ժամանակակից ճանաչված գրող, լրագրող Աշոտ Աղաբաբյանի հետ, որին մասնակցեցին շուրջ երկու տասնյակ մարզային, համայնքային և դպրոցական գրադարաններ։

Գրադարաններն Աշոտ Աղաբաբյանից նվեր ստացան հեղինակի վերջին երկու՝ «Սև հովազ» և «Նմանակը» գրքերի օրինակներ։ Ազգային գրադարանն իր հերթին գրադարաններին նվիրեց Մկրտիչ Սարգսյանի, Երվանդ Ազատյանի, Արա Տեր-Խաչատրյանի գրքերից, որոնք կգոհացնեն գրադարանների տարբեր ճաշակի և հետաքրքրության տեր ընթերցողներին։

Նշենք, որ Աշոտ Աղաբաբյանի գրքերը մշտապես տեղ են զբաղեցնում Հայաստանի ազգային գրադարանի ամենամսյա ամենապահանջարկված գեղարվեստական գրքերի տասնյակներում։ 2024թ. նրա «Սև հովազ», «Ռեզիդենտը», «Գաղտնիքների տիրակալը» և «Մենակը» գրքերը 9 անգամ առաջատար տեղերում են եղել։

Աշոտ Աղաբաբյանն իր բացման խոսքում նշեց, որ շատ է կարևորում գրադարանների հետ կապը և հաճախ է հանդիպումներ ունենում ընթերցողների հետ։ Ջերմ և անկաշկանդ հանդիպման ընթացքում գրադարանների ներկայացուցիչները հետաքրքիր դրվագներ պատմեցին Աշոտ Աղաբաբյանի գրքերի ընթերցանության և առհասարակ իրենց գրադարանների մասին։