Հայաստանի ազգային գրադարանը Հիւսիսային Օսեթիոյ «Էրեբունի» հայկական ազգային-մշակութային կազմակերպութենէն ստացած արժէքաւոր հրատարակութիւններով համալրուած է։ Գրադարանը կազմակերպութենէն նուէր ստացած է «Մեր Օսեթիան. Էրեբունի» պատկերագիրքը եւ «Էրեբունի» ամսաթերթը։ Պատկերագիրքը նուիրուած է կազմակերպութեան 30-ամեակին։ Անիկա կը պատմէ Օսեթիոյ մէջ ապրող հայ համայնքի մասին՝ սկսած անոնց առաջին բնակեցումէն Վլատիկաւկասի մէջ (17–18-րդ դարեր) մինչեւ մեր օրերը։ Անիկա կը բացայայտէ, թէ ինչպէս հայերը ոչ միայն հաստատուած են տարածաշրջանէն ներս, այլեւ նշանակալի դեր ունեցած են անոր զարգացման մէջ՝ յատկապէս արհեստագործութեան, առեւտուրի, կրթութեան եւ մշակոյթի ոլորտներուն մէջ։

Գրքին մէջ ներկայացուած են պատմական կարեւոր դրուագներ՝

▪ հայկական եկեղեցիներու կառուցում,

▪ Վլատիկաւկասի առաջին հայկական դպրոցի պատմութիւնը,

▪ հայ վաճառականներու եւ գերդաստաններու թողած ճարտարապետական ժառանգութիւնը,

▪ հայազգի նշանաւոր գործիչներու գործունէութիւնը։

Պատկերագիրքը հարուստ է եզակի արխիւային լուսանկարներով, փաստաթուղթերով եւ համայնքային կեանքի վաւերագիրներով, որոնք արժէքաւոր նիւթ են ոչ միայն հետազօտողներուն, այլեւ լայն ընթերցողին համար։ Շնորհակալութիւն կը յայտնենք «Էրեբունի» հայկական ազգային-մշակութային կազմակերպութեան՝ ի դէմս տնօրէն Ա. Վ. Սաֆրոնիտի-Մելիքեանի, համագործակցութեան եւ արժէքաւոր հրատարակութիւնները գրադարանին փոխանցելուն համար։