Հայաստանի ազգային գրադարանին մէջ դեկտեմբեր 27-ին տօնական տրամադրութիւն կը տիրէր։ Ամանորեան ջերմ եւ տօնական միջոցառումով գրադարանը ամփոփեց հիմնադրման 105-ամեակին նուիրուած միջոցառումներուն շարքը։ Այս հանդիսութիւնը իւրայատուկ նուէր մըն էր ընթերցողներուն կողմէ՝ շնորհակալական ուղերձ գրադարանավարներուն, որոնք տարուան ընթացքին իրենց նուիրուած աշխատանքով կ'աջակցին գրադարանի հազարաւոր ընթերցողներուն եւ այցելուներուն՝ բաւարարելով անոնց տեղեկատուական եւ հետազօտական կարիքները։

«Գրադարանի գոյութեան համար ամէնէն կարեւորը ընթերցողներն են. եթէ կան անոնք, կան նաեւ գրադարանները, որմով նաեւ կը հիմնաւորուի այդ կառոյցներուն գոյութիւնը», - իր խօսքին մէջ նշեց ՀԱԳ տնօրէնուհի Աննա Չուլեանը։

Ուրախ երաժշտական ծրագիրը կազմուած էր մեր ընթերցողներ՝ Շարլոթ Տիլոյեանի, Մարիամ Միրզոյեանի, Էրիք Բարսեղեանի, Ինկա Աւետիսեանի, Արման Շիրուանեցիի եւ այլոց կատարումներով։ Միջոցառման մասնակիցները իրենց կատարումներով ողջունեցին «Բիւր-Աստղ» նախագիծի շնորհալի սաները՝ թաւջութակահար Վահէ Դանիէլեանը, որ Ռուզաննա Աւետիսովայի դաշնամուրային նուագակցութեամբ կատարեց Քարլ Տավիտովի «Պարը», իսկ տաղանդաւոր քանոնահարներ Մերի Մուսինեանն ու Քրիսթինէ Ենկոյեանը միասին կատարեցին Նիքոլո Փականինիի «Վենետիկեան պարը»։ Թամանեանական դահլիճը իրենց աշխուժ եւ կրակոտ կատարումներով մասնակիցներուն երկարատեւ ծափողջոյններով լեցուցին «Մուշեղ Նազարէթեան եւ սաներ» հայկական ժողովրդական նուագարաններու խումբի պատանի երաժիշտները եւ անոնց ղեկավարը։

Միջոցառման ջերմ, հիւրընկալ եւ անկաշկանդ մթնոլորտը անգամ մը եւս ընդգծեց ընթերցողներու եւ գրադարանի աշխատակիցներու միջեւ ձեւաւորուած բարեկամական ու հոգատար կապը՝ յիշեցնելով, որ Ազգային գրադարանը ոչ միայն գիտութեան ու մշակոյթի կեդրոն է, այլեւ համայնքաստեղծ միջավայր մը։ Երեկոյթին ծրագիրը վարեցին լրագրող Սիմոն Յովհաննիսեանն ու գրադարանի աշխատակից Սիրանոյշ Հախուերտեանը։