Հայաստանի ազգային գրադարանի թամանեանական մեծ դահլիճին մէջ Սինէ-ակումբի՝ ֆրանսական ֆիլմերու այս տարուան ցուցադրութիւնը սկսաւ Ռոպէր Պրեսոնի «Մուշեթ» ֆիլմով։ «Մուշեթ»-ը խորապէս յուզիչ ֆիլմ մըն է՝ լռութեան, ճակատագրի եւ մենութեան մասին, որ քննադատները յաճախ կը համարեն Պրեսոնի ամէնէն զօրաւոր գործը։ Ֆիլմը արժանացած է Քանի ֆիլմի փառատօնի յատուկ մրցանակին (OCIC Award)։

Հայաստանի ֆրանսական հիմնարկի գործադիր տնօրէն Տաւիտ Թիւրսը իր խօսքին մէջ շնորհակալութիւն յայտնեց ֆիլմի բեմադրիչ, ֆիլմագէտ եւ «Ֆիլմադարան»-ի հիմնադիր նախագահ Գարեգին Զաքոյեանին՝ հայ հանդիսատեսին ֆրանսական ֆիլմերու լաւագոյն ընտրանին ներկայացնելու, ինչպէս նաեւ Հայաստանի ազգային գրադարանի տնօրէնուհի Աննա Չուլեանին՝ այս նախաձեռնութեան մեծապէս աջակցելու համար։

Գարեգին Զաքոյեանը, փոխադարձաբար շնորհակալութիւն յայտնելով՝ ընդգծեց, որ ֆրանսական ֆիլմը իսկական գանձարան մըն է, իսկ Պրեսոնը ֆրանսական ֆիլմարուեստի պատմութեան մեծագոյն բեմադրիչներէն մէկն է։ Ֆիլմին մասին խօսելով՝ Զաքոյեան նշեց, որ ասիկա բաւական դժուար դիտուող եւ խորունկ ֆիլմ մըն է՝ թէ՛ ոճային, թէ՛ իմաստաբանական առումով, որուն մասին խօսելու համար նոյնիսկ ամբողջ կեանք մը չի բաւեր։

Սինէ-ակումբը Հայաստանի ազգային գրադարանին մէջ կը գործէ արդէն չորրորդ տարին ըլլալով՝ «Ֆիլմադարան» ֆիլմի մշակոյթի զարգացման ՀԿ-ի, Ազգային գրադարանի եւ Հայաստանի մէջ Ֆրանսայի դեսպանութեան Ֆրանսական հիմնարկի համագործակցութեամբ՝ ներկայացնելով ֆրանսական ֆիլմերու ընտիր հաւաքածոն ֆիլմասէրներուն։ Ֆիլմերը կը ցուցադրուին ֆրանսերէնով՝ հայերէն եւ անգլերէն ենթագրերով։ Այս տարի սինէ-ակումբը կ'առաջարկէ Ռոպէր Պրեսոնի ֆիլմերու յետահայեաց ցուցադրութիւն մը։