Հայաստանի ազգային գրադարանի թամանյանական մեծ դահլիճում Սինե-ակումբի` ֆրանսիական ֆիլմերի այս տարվա ցուցադրությունը սկսվեց Ռոբեր Բրեսոնի «Մուշետ» ֆիլմով։ «Մուշետը» բավական հուզիչ ֆիլմ է՝ լռության, ճակատագրի և մենության մասին, որը քննադատները հաճախ Բրեսոնի ամենահզոր ֆիլմ են որակում։ Ֆիլմն արժանացել է Կաննի կինոփառատոնի հատուկ մրցանակի (OCIC Award)։

Հայաստանի ֆրանսիական ինստիտուտի գործադիր տնօրեն Դավիդ Տյուրսը իր խոսքում շնորհակալություն հայտնեց կինոռեժիսոր, կինոգետ, «Ֆիլմադարան»-ի հիմնադիր նախագահ Գարեգին Զաքոյանին՝ հայ հանդիսատեսին ֆրանսիական ֆիլմերի լավագույն ընտրանին ծանոթացնելու և Հայաստանի ազգային գրադարանի տնօրեն Աննա Չուլյանին՝ այս գաղափարին մեծապես աջակցելու համար։

Գարեգին Զաքոյանը, փոխադարձ շնորհակալություն հայտնելով, նշեց, որ ֆրանսիական ֆիլմը մի գանձարան է, իսկ Բրեսոնը ֆրանսիական կինոյի պատմության մեծագույն ռեժիսորներից մեկն է: Ֆիլմի մասին խոսելիս Զաքոյանը նշեց, որ սա բավականին դժվար դիտվող ու լուրջ ֆիլմ է՝ և՛ ոճային, և՛ տրամաբանական առումով, որի մասին խոսելու համար մի կյանքն անգամ չի բավականացնի։

Սինե-ակումբը Հայաստանի ազգային գրադարանում գործում է արդեն չորրորդ տարին անընդմեջ` «Ֆիլմադարան» կինոմշակույթի զարգացման ՀԿ-ի, Ազգային գրադարանի, Հայաստանում Ֆրանսիայի դեսպանության/Ֆրանսիական ինստիտուտի համագործակցությամբ` կինոսերներին ներկայացնելով ֆրանսիական ֆիլմերի ընտրանին։ Ֆիլմերը ցուցադրվում են ֆրանսերեն` հայերեն և անգլերեն ենթագրերով։ Այս տարի կինոակումբն առաջարկում է Ռոբերտ Բրեսոնի ֆիլմերի հետահայաց ցուցադրությունը։