Յուլիս 9-էն 12 Մեսրոպ Մաշտոցի անուան Մատենադարանէն ներս տեղի ունեցաւ Հայագիտական միջազգային համաժողովը, որ կազմակերպուած էր Հայաստանի Կրթութեան, գիտութեան, մշակոյթի եւ մարմնամարզութեան նախարարութեան եւ Հայաստանի բարձրագոյն կրթութեան եւ գիտութեան կոմիտէի աջակցութեամբ։

Համաժողովը համախմբած էր տասնեակ յառաջատար գիտնականներ՝ աշխարհի տարբեր հեղինակաւոր համալսարաններէ, հետազօտական կեդրոններէ, ինչպէս նաեւ հոգեւոր-ձեռագրական հաստատութիւններու ներկայացուցիչներ։ Համաժողովի հիմնական նպատակն էր խթանել հայագիտութեան արդի ուղղութիւններու զարգացումը, գիտական համագործակցութիւնները եւ նորարարական մօտեցումներու կիրառումը գիտութեան բնագաւառին մէջ։ Հայաստանի ազգային գրադարանի տնօրէնուհի Աննա Չուլեանը համաժողովին ներկայացուց «Հայաստանի ազգային գրադարանի հաւաքածոներու դերը հայագիտական հետազօտութիւններու զարգացման գործին մէջ» խորագրով զեկոյց մը։

Ներկայացուեցան Հայաստանի ազգային գրադարանի հնատիպ եւ եզակի գրապահոցերու, պարբերականներու եւ այլ արժէքաւոր նիւթերու ընդգրկուն հաւաքածոները, որոնք կարեւոր սկզբնաղբիւր կը հանդիսանան գիտական տարբեր ուղղութիւններու՝ լեզուաբանութեան, պատմագիտութեան, գրականագիտութեան եւ մշակութաբանութեան բնագաւառներուն մէջ հայագիտական ուսումնասիրութիւններու համար։