Հայաստանի ազգային գրադարանէն ներս մեկնարկեց «Արեւելք-Արեւմուտք․ մշակութային միջնորդներ (գրականութիւն, երաժշտութիւն, պար, թատրոն, գեղանկարչութիւն, գրծապատկեր, ճարտարապետութիւն, քանդակ, ֆիլմ)» եռօրեայ միջազգային համաժողովը։ Համաժողովը կազմակերպուած է ՀՀ ԳԱԱ Հայագիտութեան եւ հասարակական գիտութիւններու բաժանմունքի, ԳԱԱ Մ. Աբեղեանի անուան գրականութեան հիմնարկի, Կորքիի անուան համաշխարհային գրականութեան հիմնարկի եւ Հայաստանի ազգային գրադարանի համագործակցութեամբ։

Արեւելքի ու Արեւմուտքի միջեւ գտնուղ Հայաստանը դարեր շարունակ եղած է մշակութային միջնորդութեան բնական տարածքը՝ ճանապարհներու, գաղափարներու եւ արուեստներու հանգոյց։ Համաժողովի առանցքային գաղափարը «միջնորդութիւնն» էր՝ որպէս մշակոյթներու երկխօսութեան գործիքակազմ։ Միջնորդը միշտ անձ չէ միայն․ անիկա կրնայ ըլլալ թարգմանչական դպրոցի աւանդոյթ, հրատարակչական քաղաքականութիւն, թատերագիտական փորձ, երաժշտական կամ տեսողական լեզու, գիտական արխիւ կամ թուային հարթակ։

Համաժողովի զեկուցումներու շրջանակը ընդգրկեց մշակութային միջնորդութեան տեսական եւ գործնական դրսեւորումները, ժամանակակից թուայնացման գործընթացներու առաջադրած մարտահրաւէրները, հաւաքական յիշողութեան փոխակերպումները, ինչպէս նաեւ մշակութային հաղորդակցութեան բազմազան ձեւերը։ Զեկոյցներուն մէջ ուշադրութեան կեդրոնին էին նշանաբանական եւ լրատուան արհեստագիտութեան մօտեցումները, թուային մշակոյթի գործիքները (թուային արխիւ, հանրագիտարան, համակարգչային վէպ եւ այլն), որոնք հանդէս եկան որպէս մշակութային միջնորդութեան նորարար հարթակներ։ Համաժողովի աշխատանքները կը ղեկավարէին համանախագահներ՝ ակադեմիկոս, ՀՀ ԳԱԱ Հայագիտութեան եւ հասարակական գիտութիւններու բաժանմունքի ակադեմիկոս-քարտուղար Եուրի Սուվարեանը, բանասիրական գիտութեանց դոկտոր, Ռուսիոյ գիտութիւններու ակադեմիայի թղթակից անդամ, Մ. Ա. Կորքիի անուան համաշխարհային գրականութեան հիմնարկի տնօրէն Վատիմ Փոլոնսքին, բանասիրական գիտութեանց թեկնածու, ՀՀ ԳԱԱ Մ. Աբեղեանի անուան գրականութեան հիմնարկի տնօրէն Հերիքնազ Որսկանեանը եւ Հայաստանի ազգային գրադարանի տնօրէնուհի Աննա Չուլեանը։ «Արեւելք-Արեւմուտք․ մշակութային միջնորդներ» համաժողովը կարեւոր հարթակ մը հանդիսացաւ բազմակողմանի գիտական քննարկումներու, մշակոյթներու եւ քաղաքակրթութիւններու միջեւ երկխօսութեան խթանման համար։