Փորագրանկարչութեան խոշորագոյն վարպետ, ֆրանսահայ հանրածանօթ նկարիչ, ֆրանսական Պատուոյ լեգէոնի ասպետ եւ շքանշանակիր Էտկար Շահինի 150-ամեակը կը նշուի այս տարի։ Մեծ արուեստագէտին ստեղծագործութիւնը հայ մշակոյթի եւ 20-րդ դարու սկիզբի եւրոպական կերպարուեստի նշանակալից երեւոյթներէն է։ Ան Վենետիկի մեծ նկարիչներէն էր, Վենետիկի պատուաւոր քաղաքացի։

Շահինը ստեղծագործած է նաեւ գիրքի նկարազարդման բնագաւառին մէջ. ձեւաւորած է Անատոլ Ֆրանսի «Կատակերգական պատմութիւն», Կուսթաւ Ֆլոպէրի «Նոյեմբեր», Կապրիէլ Մուրէի «Փարիզի տօնավաճառի մարդիկ» (140 օֆորթ), Մորիս Պարէսի «Վենետիկի մահը», Վերգիլիոսի «Մշակականք» (Տիգրան Պոլատի եւ 15 այլ նկարիչներու հետ) եւ այլ գիրքեր։ Արշակ Չոպանեանի անմիջական միջնորդութեամբ նկարիչին գործերը մատչելի կը դառնային նաեւ հայ արուեստասէրին, անոր գործերը տպագրուած են «Անահիտ», «Գեղունի», «Բազմավէպ», «Գեղարուեստ» եւ այլ հանդէսներու մէջ։

Շահինը ծանօթութիւն ունեցած է Գրիգոր Զօհրապի, Դանիէլ Վարուժանի, Սիամանթոյի, Ղեւոնդ Ալիշանի, Կոմիտասի, ժամանակի շատ հայ հանրածանօթ նկարիչներու հետ։ Էտկար Շահինի գործերը կը պահուին Փարիզի ազգային գրադարանէն ներս, Վենետիկի քաղաքային թանգարանին մէջ, Հայաստանի ազգային պատկերասրահին մէջ (աւելի քան 300 գործ), Էրմիթաժի մէջ, Մոսկուայի Փուշկինի անուան կերպարուեստի եւ եւրոպական երկիրներու այլ թանգարաններու մէջ։ Առաւել մանրամասն՝ ՀԱԳ պաշտօնական կայքին վրայ: